হোজাই, 7 জুনঃ হোজাইৰ ডবকাত অঘটন৷ ব্ৰজপাত পৰি নিহত হ'ল মানিক আহমেদ নামৰ এজন ব্যৱসায়ী লগতে আহত হয় মানিকৰ দুই ভাতৃ৷ হোজাই জিলাৰ ডবকাৰ সমীপৱৰ্তী মেথিগাঁৱত শুকুৰবাৰে দিনৰ ভাগত সংঘটিত হয় এই কাণ্ড৷ দিনৰ দুপৰীয়া ভাগত হঠাৎ অহা বিজুলী-ঢেৰেকনিৰ সময়ত ব্ৰজপাত পৰি নিহত হয় গাঁওখনৰ মানিক আহমেদ নামৰ সৰবৰহী যুৱকজন৷
ব্ৰজপাত পৰাৰ লগে লগে মানিকক উদ্ধাৰ কৰি পৰিয়ালৰ লোকে ডবকা চিকিৎসালয়ত ভৰ্তি কৰে যদিও চিকিৎসকে মানিকক মৃত ঘোষণা কৰে৷ ব্ৰজপাতত মানিকৰ দুই ভাতৃ শ্বহীদ আহমেদ আৰু হুছেইন আহমেদ গুৰুতৰ ভাৱে আহত হয় ৷ আহত দুয়োজনকে ডবকা চিকিৎসালয়ত ভৰ্তি কৰা হয়৷ পেছাত ব্যৱসায়ী মানিকৰ মৃত্যুত শোকত ভাগি পৰিছে পৰিয়ালৰ লোক৷ উল্লেখ্য যে বিগত বৰ্ষতো মানিকৰ ঘৰত ব্ৰজপাত পৰি আহত হৈছিল পৰিয়ালৰ দুজন লোক৷