নিউজ ডেস্ক, 27 জুন :বন বিভাগৰ সতৰ্ক দৃষ্টিৰ মাজতো একাংশ অসৎ লোকৰ দ্বাৰা অব্যাহত আছে বনাঞ্চল ধ্বংস যজ্ঞ(deforestation) । বনাঞ্চল ধ্বংস কৰা এইসকল লোকৰ বিৰুদ্ধে তৎপৰ হৈ বন বিভাগে(forest department) চলাইছে তীব্ৰ অভিযান ৷ ৰাজ্যৰ ক’ত ক’ত চলিল বন বিভাগৰ অভিযান-
নগাঁও জিলাৰ চামগুৰিত বন বিভাগৰ অভিযান :
শনিবাৰে নিশা নগাঁও জিলাৰ শালনা বনাঞ্চলিক কাৰ্যালয়ৰ বনকৰ্মীৰ এটা দলে এক গোপন সূত্ৰৰ তথ্যৰ ভিত্তিত অভিযান চলাই চামগুৰি সমষ্টিৰ অন্তৰ্গত লটানি চাপৰি আৰু কাৱৈমাৰী অঞ্চলৰ পৰা দুটাকৈ অবৈধ বেঞ্চ কাঠমিল উৎখাত কৰে ৷ লগতে যন্ত্ৰ-পাটি সমূহো জব্দ কৰিবলৈ সক্ষম হয় ৷ দেওবাৰে পুৱা প্ৰায় ৯.৩০ মান বজাত শালনা বনাঞ্চলিক কাৰ্যালয়ৰ অন্তৰ্গত চাপানালা খণ্ড বন কাৰ্যালয়ৰ বন বিষয়া নজমুল আহমেদৰ নেতৃত্বত যোৱা এটি অভিযানকাৰী দলে বঢ়মপুৰ সমষ্টিৰ অন্তৰ্গত চলচলিৰ বামুণগাঁও চাৰিআলিৰ পৰা এ এছ ০১ ডি চি ৭৩৫৮ নম্বৰৰ এখন চোৰাং কাঠ ভৰ্তি মিনি ট্ৰাক জব্দ কৰিবলৈ সক্ষম হয় ৷
চাপানালা খণ্ড বন কাৰ্যালয়ৰ বনকৰ্মীসকলে জব্দ কৰা উক্ত চোৰাং শাল কাঠসমূহৰ মূল্য আনুমানিক অৰ্ধ লক্ষাধিক টকা হ‘ব ৷ অৱশ্যে চোৰাং কাঠ সৰবৰাহকাৰীৰ দলটোৱে সুযোগ বুজি গাড়ী এৰি পলায়ন কৰিবলৈ সক্ষম হয় ৷ যাৰ বাবে চোৰাং কাঠৰ ব্যৱসায়ৰ লগত জড়িত এজন লোককো কৰায়ত্ব কৰিবলৈ সক্ষম নহ'ল বন বিভাগ ।