হোজাই, ১২ নৱেম্বৰ: ৩ দিন পূৰ্বে লংকা আঞ্চলিক বন বিষয়াই পি গেভেলছৰ ট্ৰাক জব্দ কৰাৰ পিছৰে পৰা আৰম্ভ হৈছে বন মাফিয়াৰ উদ্ভণ্ডালি। গোপন সূত্ৰৰ পম খেদি লংকাত ৫ খন পি গ্ৰেভেল ভৰ্তি ট্ৰাক জব্দ কৰিছিল লংকা আঞ্চলিক বন বিষয়াৰ নেতৃত্বত অভিযান চলোৱা এটা দলে। জব্দকৃত ট্ৰাককেইখন মোকলাই দিবলৈ বন বিষয়াৰ ওপৰত হেঁচা প্ৰয়োগ কৰি আছে একাংশ বন মাফিয়াই। আনহাতে, ট্ৰাককেইখন জব্দ কৰি লংকা বন কাৰ্যালয়ৰ পৰা ১৫ কিলোমিটাৰ দূৰত থকা লংকাজান উপ-খণ্ড বন বিভাগৰ কাৰ্যালয়ৰ কাষত তথা লংকা-লামডিং সংযোগী ২৭ নং ৰাষ্ট্ৰীয় ঘাইপথত ৰখাই থয়।
বন বিভাগৰ এনে কাৰ্যত ক্ষুদ্ধ হৈ পৰে স্থানীয় দল সংগঠন । জব্দকৃত ট্ৰাককেইখনৰ চালানো ভুৱা বুলি দাবী কৰে সংগঠনকেইটাই । কিয়নো, উক্ত চালানকেইখন কাৰ্বি আংলঙৰ আৰু কাৰ্বি আংলঙত এই পৰ্যন্ত পি গ্ৰেভেলৰ খনিৰ অনুমতি দিয়া নাই। তেনেস্থলত জব্দকৃত ট্ৰাককেইখনে এই চালানবোৰ ক'ৰ পৰা পালে বুলি প্ৰশ্ন উত্থাপন কৰিছে স্থানীয় সংগঠনবোৰে । চালানকেইখনত উল্লেখ থকা মতে পি গ্ৰেভেল অসমৰ চুবুৰীয়া ৰাজ্য ত্ৰিপুৰাৰ আগৰতলালৈ ৰপ্তানি কৰা হৈছে।