অসম-মিজোৰাম সীমান্তত উত্তপ্ত পৰিস্থিতি

অসম-মিজোৰাম সীমান্তৱৰ্তী কচুৰতল অঞ্চলত উত্তপ্ত পৰিস্থিতি ৷ অসম-মিজোৰাম সীমা সমস্যা সমাধানৰ দাবীত ৰাষ্ট্ৰীয় ঘাইপথ অৱৰোধ ৷ হাইলাকান্দি জিলাৰ ঘাৰমুড়া ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত বিভিন্ন দল সংগঠনৰ ৷ ৰাজপথত জুই জ্বলাই বিক্ষোভ প্ৰদৰ্শন প্ৰতিবাদকাৰীৰ ৷

হাইলাকান্দি, 10 ফেব্ৰুৱাৰী:অসম-মিজোৰাম সীমা সমস্যাক লৈ পুনৰ উত্তপ্ত অসম-মিজোৰাম সীমান্তৱৰ্তী কচুৰতল অঞ্চল ৷ সীমা সমস্যা সমাধানৰ দাবীৰে বুধবাৰে বিভিন্ন দল সংগঠনৰ শতাধিক কৰ্মীয়ে হাইলাকান্দি জিলাৰ কাটলিছেৰা ঘাৰমুড়া ৰাষ্ট্ৰীয় ঘাইপথ অৱৰোধ কৰি পৰিৱেশ উত্তাল কৰি তোলে ৷

সীমা সমস্যা সমাধানৰ ক্ষেত্ৰত চৰকাৰৰ বিৰুদ্ধে বিফলতাৰ অভিযোগ উত্থাপন কৰি ক্ষোভিত প্ৰতিবাদকাৰী সকলে ৰাজপথৰ মাজতে জুই জ্বলাই বিক্ষোভ প্ৰদৰ্শন কৰি শীঘ্ৰে সীমা সমস্যা সমাধানৰ দাবী উত্থাপন কৰে ৷

বুধবাৰে পুৱাৰ পৰা বিভিন্ন দল সংগঠনৰ কৰ্মী সকল একেলগ হৈ এনেদৰে ৰাজপথত প্ৰতিবাদ সাব্যস্ত কৰি সীমা সমস্যা সমাধানৰ ক্ষেত্ৰত চৰকাৰে ব্যৱস্থা গ্ৰহণ নকৰা পৰ্যন্ত এই প্ৰতিবাদ অব্যাহত ৰখাৰ হুংকাৰ দিয়ে ৷

উল্লেখ্য যে সীমান্ত অঞ্চলত বৰ্তমানলৈকে প্ৰায় 54 টাকৈ ঘৰ দুস্কৃতিকাৰীয়ে জ্বলাই দিয়া বুলি জানিব পৰা গৈছে ৷ দুস্কৃতিকাৰীৰ এই কাৰ্যৰ পাছতে কচুৰতল অঞ্চলত এতিয়াও উত্তেজনাই বিৰাজ কৰি আছে ৷

জানিব পৰা মতে মঙলবাৰৰ পৰা প্ৰশাসনে উক্ত অঞ্চলৰ পৰা সকলো লোকক আঁতৰি যোৱাৰ নিৰ্দেশ প্ৰদান কৰিছে ৷ প্ৰাপ্ত তথ্য অনুসৰি আৰক্ষী আৰু অৰ্ধ সামৰিক বাহিনী উক্ত অঞ্চলত মোতায়েন কৰাৰ পাছত অঞ্চলটোৰ পৰিস্থিতি বৰ্তমান কিছু নিয়ন্ত্ৰণলৈ আহিছে ৷

লগতে পঢ়ক:বহিঃৰাজ্যৰ পৰা অসমলৈ আহিলে কৰিব নালাগে ক’ভিড-19ৰ পৰীক্ষা