গোলাঘাট,১৬ ফেব্ৰুৱাৰী :গোলাঘাটত দিনক দিনে চোৰৰ উপদ্ৰৱ বৃদ্ধি পাইছে (Thief terror in Golaghat)। বুধবাৰে নিশা গোলাঘাট নগৰৰ মাজমজিয়াৰ দুখনকৈ বিপণিত চোৰে চলালে লুট-পাত । মিঠাইৰ দোকান আৰু ফাৰ্মাচীত এইবাৰ চোৰে চলালে লুট-পাত (Thieves loot sweet shops and pharmacies)। নিৰাপত্তাহীনতাত ভুগিছে গোলাঘাটবাসীয়ে ।
উল্লেখ্য যে, নিশা হ'লেই চোৰৰ ৰম্যভূমিত পৰিণত হয় গোলাঘাট নগৰ । প্ৰায় প্ৰতিদিনে নগৰখনত চুৰিকাৰ্য সংঘটিত হয় । এইবাৰ গোলাঘাট সদৰ আৰক্ষী থানাৰ পৰা প্ৰায় ৩০০ মিটাৰ নিলগত চোৰে চাফাই চলালে অভিযান । নগৰৰ মাজমজিয়াত অৱস্থিত গোলাঘাট জিলা ক্ৰীড়া সন্থাৰ কমাৰ্চিয়েল কমপ্লেক্সৰ পূজা চুইটছ আৰু ৰেডে প্ৰেছকিপচন নামৰ দুখন ব্যৱসায়িক প্ৰতিষ্ঠানত নিশা চোৰে লুট-পাত চলায় (Theft in Golaghat)।
চোৰে ফাৰ্মাচীৰ পৰা নগদ ১০ হাজাৰ টকাৰ লগতে বিভিন্ন সামগ্ৰী লুট কৰি লৈ যায় । আনহাতে, পূজা চুইটছ নামৰ মিঠাইৰ দোকানৰ পৰাও প্ৰায় ১৫ হাজাৰ টকা লৈ যোৱা বুলি জানিব পৰা গৈছে । লগতে চকলেট, মিঠাই আদি বিভিন্ন সামগ্ৰীও লুট কৰি লৈ যায় চোৰে । ইফালে নিতৌ চোৰৰ অতপালি দেখি চিন্তিত হৈছে গোলাঘাটবাসী । ভুক্তভোগী লোকসকলে অভিযোগ কৰা মতে ৰাইজক নিৰাপত্তা প্ৰদানত ব্যৰ্থ হৈছে গোলাঘাট আৰক্ষী । নিশা আৰক্ষীয়ে তহল দিয়াৰ ক্ষেত্ৰত অৱহেলা কৰাৰো অভিযোগ কৰিছে স্থানীয় ৰাইজে ।