গোলাঘাট, 3 জানুৱাৰী : গোলাঘাট জিলাৰ দেৰগাঁৱৰ বালিজানত বুধবাৰৰ পুৱা ভয়ংকৰ পথ দুৰ্ঘটনা সংঘটিত হৈছে ৷ পুৱতি নিশা গোলাঘাট বচাগাঁৱৰ পৰা এদল লোকে বনভোজ খাবলৈ তিনিচুকীয়া অভিমুখে AS 02 AC 5083 নম্বৰৰ বাছেৰে গৈ আছিল ৷ তাৰ পিচতে বিপৰীত দিশৰ পৰা অহা এখন ট্ৰাকৰ সৈতে মুখামুখি সংঘৰ্ষ হোৱাৰ ফলত ভয়ংকৰ দুৰ্ঘটনাত পতিত হয় বাহনখন ৷ ফলত ঘটনাস্থলীতে শিশুসহ দহজন লোক নিহত হয় ।
ইফালে চিকিৎসালত আন দুজন লোকৰ মৃত্যু হয় ৷ আনহাতে গুৰুতৰভাৱে আঘাতপ্ৰাপ্ত অৱস্থাত 27 জনক যোৰহাট চিকিৎসা মহাবিদ্যালয়লৈ প্ৰেৰণ কৰা হৈছে বুলি গোলাঘাটৰ আৰক্ষী অধীক্ষক ৰাজেন সিঙে জানিবলৈ দিয়ে ।
জানিব পৰা মতে, গোলাঘাট আঠখেলীয়া ভৰলুৱাৰ পৰা তিনিচুকীয়া টিলিঙা মন্দিৰলৈ বনভোজ খাবলৈ আহিছিল প্ৰায় 45 জনীয়া দলটো । মাৰ্ঘেৰিটাৰ পৰা আহি থকা AS 01 PC 0648 নম্বৰৰ এখন ট্ৰাকখনৰ সৈতে মুখামুখি সংঘৰ্ষ হয় AS 02 AC 5383 নম্বৰ যাত্ৰীবাহী বাছখনৰ । ঘটনাস্থলীত মৃত্যু হোৱা কেইজনৰ মৃতদেহ সম্প্ৰতি দেৰগাঁৱৰ ৩০খন বিছনাযুক্ত সামূহিক চিকিৎসালয়ত ৰখা হৈছে ৷