1 বজাৰ দহটা শীৰ্ষ বাতৰি...

1 বজাৰ দহটা শীৰ্ষ বাতৰি...

মুখ্যমন্ত্ৰী হিচাপে দায়িত্ব লোৱাৰ পাচতে দুদিনীয়া ভ্ৰমণসূচীৰে ডিব্ৰুগড়ত উপস্থিত হয় ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মা ৷ জিলাখনৰ সাম্প্ৰতিক পৰিস্থিতিৰ বুজ লোৱাৰ লগতে বান ব্যৱস্থাপনাৰ বুজ ল'বলৈ উপায়ুক্তৰ কাৰ্যালয়ত জিলাখনৰ শীৰ্ষ বিষয়াসকলৰ সৈতে এখন গুৰুত্বপূৰ্ণ বৈঠকত মিলিত হয় মুখ্যমন্ত্ৰী ড৹ হিমন্ত বিশ্ব শৰ্মা (Himanta Biswa Sarma) ৷

শিৱসাগৰ জিলাতো প্ৰশাসনৰ উদ্যোগত 21 জুনৰ পৰা 18 বছৰ ঊৰ্ধৰ ব্যক্তিসকলৰ বাবে ক'ভিড-19 প্ৰতিষেধক প্ৰদান কাৰ্যসূচী ৰূপায়ণ কৰিছে ৷ সম্পূৰ্ণ ক'ভিড-19 প্ৰট'কল মানি চলি ১৮ বয়সৰ উৰ্ধৰ ব্যক্তি সকলক প্ৰতিষেধক প্ৰদান কৰা হ'ব। তেওঁ উল্লেখ কৰে যে, এই অভিযানৰ প্ৰথম দিনা জিলাখনৰ মুঠ 40 টা কেন্দ্ৰত মুঠ 8,000 পালি ক'ভিশ্বিল্ড প্ৰতিষেধক প্ৰদান কৰা হ'ব।

হায়াৰ ছেকেণ্ডাৰী (HS) আৰু মেট্ৰিক (HSLC) পৰীক্ষা বাতিলৰ ঘোষণা কৰাৰ লগে লগে অন্ত পৰিল দীৰ্ঘদিনে পৰীক্ষাক লৈ সৃষ্টি হৈ থকা কৌতুহলৰ ৷ পৰীক্ষা বাতিল কৰাৰ লগে লগে বিভিন্ন জনে বিভিন্ন মত প্ৰকাশ কৰিছে ৷ একাংশ অভিভাৱক তথা শিক্ষাৰ্থীৰ মতে, পৰীক্ষা অনুষ্ঠিত কৰিব লাগিছিল আন একাংশৰ মতে, পৰীক্ষা অনুষ্ঠিত নোহোৱাই ভাল হৈছে ৷ তাৰ মাজতে চৰকাৰে গ্ৰহণ কৰা পৰীক্ষা নীতিকলৈও একাংশ শিক্ষাৰ্থী দোমোজাত পৰিছে ৷ শিক্ষাৰ্থী সকলৰ প্ৰশ্ন, মূল্যাংকনৰ জৰিয়তে তেওঁলোকে ভবা ধৰণে ফলাফল লাভ কৰিব নে ? তেওঁলোকে ভবা মতে এখন ভাল কলেজত নাম ভৰ্তি কৰিব পাৰিবনে ? কি হ'ব অসমৰ লাখ লাখ পৰীক্ষাৰ্থীৰ ভৱিষ্যত ?

বিটিআৰ চুক্তিৰ ৯ নং দফা অনুসৰি প্ৰাক্তন এনডিএফবি সকলৰ পুনৰ সংস্থাপনৰ দিবলৈ ইতিমধ্যে সিদ্ধান্ত গ্ৰহণ কৰা হৈছে ৷ সেই অনুসৰি প্ৰাক নিযুক্তি প্ৰশিক্ষণৰ যোগেদি প্ৰাক্তন এনডিএফবি সকলক সামৰিক আৰু অৰ্ধসামৰিক বাহিনীত নিযুক্তি দিয়া হ’ব । যি সকলৰ নিযুক্তিৰ বয়স ইতিমধ্যে উকলি গৈছে তথা প্ৰাক নিযুক্তি প্ৰশিক্ষণৰ যোগেদিও যিসকলে যোগ্যতা অৰ্জন কৰিব নোৱাৰে তেওঁলোকক দক্ষতা বিকাশ প্ৰশিক্ষণৰ জৰিয়তে স্বাৱলম্বী কৰাৰ লক্ষ্য স্থিৰ কৰা হৈছে বুলি মন্তব্য কৰে বিটিআৰৰ মুখ্য কাৰ্যবাহী প্ৰমোদ বড়োৰ ৷

এতিয়াও নিৰ্বাপিত হোৱা নাই কামৰূপ জিলাৰ কমলপুৰৰ আল্টাৰ প্লাষ্টিক কোম্পানীৰ ভয়াৱহ অগ্নিকাণ্ড ৷ অগ্নিনিৰ্বাপক বাহিনীৰ প্ৰায় দহখনকৈ বাহনে ওৰেটো নিশা জুই নিৰ্বাপনৰ চেষ্টা অব্যাহত ৰখাৰ পাচতো জুইৰ লেলিহান শিখাই আৱৰি ৰাখে উদ্যোগটোৰ চৌপাশ ৷

চিৰাঙৰ ভাৰত-ভূটান সীমান্ত Bharat-Bhutan Borde)ৰ আমগুৰীত ৰাইজে "অসম মালা" আঁচনিৰ অধীনত নিৰ্মাণ হ'বলগীয়া চাৰিলেন যুক্ত পথ (Four Land Road) নিৰ্মানৰ বিৰোধিতা কৰি চৰকাৰৰ বিৰুদ্ধে প্ৰতিবাদ(protest) সাব্যস্ত কৰে ৰাইজে । চাৰিলেন যুক্ত পথ নিৰ্মান কৰিবলগৈ খিলঞ্জীয়া লোকক উচ্ছেদ কৰাৰ ষড়যন্ত্ৰ চলোৱা বুলি অভিযোগ কৰিছে প্ৰতিবাদকাৰী সকলে ৷

হস্ততাঁত বস্ত্ৰ শিল্প মন্ত্ৰী (handloom and Textile Minister) উৰ্খাও গৌৰা ব্ৰহ্মই দেওবাৰে চিৰাং জিলাৰ বিজনী ঝাৰবিষপানীত ধলা নৈৰ গৰাখহনীয়া পৰিদৰ্শন কৰাৰ লগতে বিজনী মহকুমাৰ অন্তৰ্গত ১নং বিষ্ণুপুৰ ঝাৰবিষপানী ধলা নৈত নিৰ্মাণ কৰা বান্ধৰ কামৰ বুজ লয়। জিলাখনৰ গৰাখহনীয়াৰ স্থায়ী সমাধান কৰাৰ লগতে ৰাইজৰ সা-সম্পত্তি যাতে নিৰাপত্তা দিব পাৰি তাৰ ব্যৱস্থা গ্ৰহণ কৰা হ'ব বুলি মন্তব্য কৰে মন্ত্ৰী ব্ৰহ্মই।

ৰাজ্য চৰকাৰে শেহতীয়াকৈ প্ৰৱৰ্তন কৰিবলৈ লোৱা জনসংখ্যা নীতিক লৈ প্ৰতিক্ৰিয়া প্ৰকাশ কৰি দেওবাৰে বিৰোধী দলপতি গৰাকীয়ে কয় যে, জনসংখ্যা বৃদ্ধি ৰোধ কৰিবলৈ কেৱল বিজেপিয়েহে যে একক প্ৰচেষ্টা চলাইছে মুখ্যমন্ত্ৰীয়ে তেনে এক ধাৰণা দিবলৈ চেষ্টা চলাইছে । কিন্তু সেয়া শুদ্ধ নহয় । কিয়নো, দেশত পূৰ্বৰ কংগ্ৰেছ চৰকাৰেই "হাম দো হামাৰে দো" শ্ল'গানেৰে জনসংখ্যা ৰোধ কৰাৰ আঁচনি লৈছিল । কংগ্ৰেছ চৰকাৰৰ দিনতে কেন্দ্ৰত শিক্ষা বিভাগৰ নাম সলনি কৰি মানৱ সম্পদ বিভাগ নাম দিয়া হৈছিল ৷ যাতে এইধৰণৰ বিষয়বিলাকো বিভাগটোৱে চকু দিব পাৰে । সেয়েহে জনসংখ্যা নীতিক লৈ মুখ্যমন্ত্ৰীয়ে ৰাজনীতি নকৰাই উচিত বুলি কয় দেৱব্ৰত শইকীয়াই ।

সোণোৱালক মোডী মন্ত্ৰীসভাত অন্তৰ্ভুক্ত হ’লে অসমৰ সকলো সাংসদে এজন অভিভাৱক লাভ কৰিব, যি তেওঁলোকক ৰাজ্যখনৰ উন্নয়নত পথ প্ৰদৰ্শক হিচাপে সহায় কৰিব বুলি মন্তব্য কুইন ওজাৰ ৷

বটদ্ৰৱাৰ ঐতিহাসিক শান্তিজানৰ জলধাৰাত বাধাহীনভাৱে প্ৰবাহিত হোৱা মুখখনত পুখুৰী খান্দি সম্পূৰ্ণ ৰূপে বন্ধ কৰাৰ পৰিকল্পনা চলাই আছিল এটা চক্ৰই । মনকৰিবলীয়া যে, বটদ্ৰৱাৰ ঐতিহাসিক দৌল মন্দিৰলৈ ভাবুকি কঢ়িয়াইছিল মীন পালনৰ নামত নদীৰ মুখ বন্ধ কৰি পুখুৰী খান্দিছিল বটদ্ৰৱাৰ ধনীয়াভেটিৰ একাংশ লোকে ।