গোলাঘাট,11 ছেপ্তেম্বৰ:গোলাঘাটত শুকুৰবাৰে উদযাপন কৰা হয় সদৌ অসম চুতীয়া ছাত্র সন্থাৰ পঞ্চদশ কেন্দ্ৰীয় প্ৰতিষ্ঠা দিৱস ৷ বীৰাংগণা সতী-সাধনী ক্ষেত্ৰত আয়োজিত উক্ত অনুষ্ঠানত উপস্থিত থাকে সদৌ অসম চুতীয়া ছাত্ৰ সন্থাৰ কেন্দ্ৰীয় প্ৰতিনিধিৰ এটা দল ৷ প্ৰতিষ্ঠা দিৱসৰ লগত সংগতি ৰাখি আয়োজিত কাৰ্যসূচীত পতাকা উত্তোলন, সতী সাধনীৰ প্ৰতিচ্ছবিত বন্তি প্ৰজ্বলনৰ পিছতে এক সংবাদমেল সম্বোধন কৰে সন্থাৰ কেন্দ্ৰীয় প্ৰতিনিধিসকলে ।
উক্ত সংবাদমেলৰ জৰিয়তে সন্থাই বিজেপি চৰকাৰৰ প্ৰতাৰণাৰ বিষয়ে উল্লেখ কৰি ৰাজ্যৰ অন্যতম চুতীয়া জনগোষ্ঠীক প্ৰতাৰণা কৰাৰ অভিযোগ উত্থাপন কৰে । লগতে জনগোষ্ঠীটোক জনজাতিকৰণৰ ক্ষেত্ৰত কোনো পদক্ষেপ গ্ৰহণ নকৰাৰ বিৰুদ্ধে ক্ষোভ প্ৰকাশ কৰে সন্থাটোৱে ৷ বৰঞ্চ স্বায়ত্ব শাসিত পৰিষদৰ পৰাও চৰকাৰে বঞ্চিত কৰিছে চুতীয়া সকলক । যাৰ বাবে 19 ছেপ্তেম্বৰৰ পৰা 15 নৱেম্বৰলৈ এলানি আন্দোলনৰ কাৰ্যসূচী গ্ৰহণ কৰিছে চুতীয়া জনগোষ্ঠীটোৱে ৷ পৰৱৰ্তী নিৰ্বাচনৰ পূৰ্বে চুতীয়াসকলক স্বায়ত্ব শাসনৰ লগতে জনজাতিকৰণৰ মৰ্যদা দিবলৈ চৰকাৰক সংবাদমেলখনৰ জৰিয়তে দাবী উত্থাপন কৰে ৷ চুতীয়াসকলৰ সুৰক্ষাৰ বাবে শীঘ্ৰে যোৰহাটৰ টীয়কত এক ৰাজনৈতিক মঞ্চ গঠন কৰাৰ কথা ঘোষণা কৰে সদৌ অসম চুতীয়া ছাত্র সন্থাৰ কেন্দ্ৰীয় প্ৰতিনিধিবৰ্গই ৷
