ডিফু,২০ জানুৱাৰী:ভাৰত চৰকাৰে বিগত বছৰকেইটাৰ দৰে এই বৰ্ষটো কৃষকসকললৈ দিছে এক আশাৰ বতৰা ৷ স্বাৱলম্বীৰ পথত আগবঢ়া কৃষকসকলে ৰাজ্যিক কৃষি সামগ্ৰী বিপণন পৰিষদক পোনপটীয়াকৈ ২,০৪০ টকাত বিক্ৰী কৰিব পাৰিব নিজেই কৰা খেতিৰ ধান । শালি ধান ক্ৰয় কৰিবলৈ চৰকাৰে সমগ্ৰ দেশৰ লগতে ৰাজ্যৰ বিভিন্ন প্ৰান্ততো ধান ক্ৰয় কেন্দ্ৰ স্থাপন কৰিছে(Paddy procurement centres open in Assam)।
পিছে এই সুবিধাৰ পৰা বঞ্চিত হৈ ৰৈছিল ধনশিৰি মহকুমাৰ কৃষক । চৰকাৰে ধাৰ্য্য কৰি দিয়া মূল্যত ধান বিক্ৰী কৰিবলৈ ওচৰত নাছিল কোনো চৰকাৰী ধান ক্ৰয় কেন্দ্ৰ ৷ যাৰ পৰিপ্ৰেক্ষিতত কৃষকসকলে বকলীয়াঘাটত গৈ ধান বিক্ৰী কৰাত ব্যাপক অসুবিধাৰ সন্মুখীন হৈছিল । কৃষকসকলৰ অভিযোগ আছিল যে তেওঁলোকে উৎপাদিত ধানৰ উচিত মূল্য নাপায় ৷
এই সমূহ অভিযোগ কৃষকসকলে উত্থাপন কৰিছিল কাৰ্বি আংলং জিলাৰ উপায়ুক্ত মধুমিতা ভাগৱতীৰ ওচৰত । কাৰ্বি আংলং জিলাৰ উপায়ুক্ত মধুমিতা ভাগৱতী যোৱাটো বৰ্ষৰ ৩০ নৱেম্বৰত ডিফু কৃষি গৱেষণা কেন্দ্ৰৰ আমন্ত্ৰণ মৰ্মে গৈছিল ধনশিৰিলৈ ৷ সেইদিনা উপায়ুক্ত গৰাকীয়ে পথাৰত নামি মেছিনেৰে ধন কাটিছিল ৷ কৃষি গৱেষণা কেন্দ্ৰই কেন্দ্ৰীয় চৰকাৰৰ আচঁনিৰ অধীনত এলেকাটোৰ কৃষকক ধান ৰোৱা, ধান কটা, ধানৰ মৰণা মৰা আৰু ধান খুন্দা মেছিন প্ৰদান কৰিছিল ৷ সেই সভাতে কৃষকসকলে উত্থাপন কৰিছিল এইসমূহ অভিযোগ ।