Horrific incident in Golaghat: ডাম্পাৰত অহা দুৰ্বৃত্তই কাটিলে যুৱকৰ হাত; গোলাঘাটত চাঞ্চল্য

গোলাঘাট জিলাৰ খুমটাত চাঞ্চল্যকৰ ঘটনা ৷ দুৰ্বৃত্তই হাত কাটি দিলে যুৱকৰ ৷ আৰক্ষীয়ে তদন্ত নকৰাৰ অভিযোগ ভুক্তভোগী যুৱকজনৰ পৰিয়ালৰ ৷

যোৰহাট, 25 ছেপ্টেম্বৰ :গোলাঘাট জিলাৰ খুমটাত চাঞ্চল্যকৰ ঘটনা ৷ প্ৰায় 23 দিনৰ পিচত পোহৰলৈ আহিছে গাৰ নোম শিহৰি উঠা ঘটনা ৷ ঘটনা অনুসৰি যোৱা 2 ছেপ্টেম্বৰত গোলাঘাট চিনাতলী অঞ্চলৰ মনোজ বৰাৰ পুত্ৰ অলমানচু বৰা কৰ্মস্থলীৰ পৰা ঘৰলৈ এখন বাইকেৰে গৈ আছিল ৷ তেনে সময়তে ঢেকীয়াল মলিয়াগাঁও নাট্য মন্দিৰৰ সমীপত এখন ডাম্পাৰত অহা দুৰ্বৃত্তই চোকা অস্ত্ৰৰে আক্ৰমণ কৰে অলমানচু বৰাক ৷ লগে লগে অলমানচু বৰা সোঁহাতখন শৰীৰ পৰা বিচ্ছিন্ন হৈ পৰে ৷ প্ৰায় 30 মিটাৰ দূৰত্বলৈ ওফৰি পৰে যুৱকজনৰ হাতখন ৷ পৰ্ৱৰতী সময়ত অচেতন অৱস্থাত উদ্ধাৰ কৰি অলমানচু বৰাক চিকিৎসালয়ত ভৰ্তি কৰে ৷

এই সমগ্ৰ ঘটনাৰ সন্দৰ্ভত ভুক্তভোগী যুৱক অলমানচু বৰাৰ পিতৃ-মাতৃয়ে স্থানীয় আৰক্ষীৰ কাষ চাপিছিল ৷ কিন্তু ঘটনাৰ সন্দৰ্ভত আৰক্ষীয়ে কোনো ব্যৱস্থা গ্ৰহণৰ নকৰাৰ লগতে, মাৰোৱাৰী ট্ৰাষ্টত হাতখন লগাই ল'লেই হ'ল বুলিও আৰক্ষীয়ে পৰামৰ্শ দিয়াৰো অভিযোগ আনিছে ভুক্তভোগী যুৱকজনৰ অভিভাৱকে ৷ সেয়ে আৰক্ষীৰ পৰা ন্যায় নোপোৱাৰ বাবে বিধায়ক মৃণাল শইকীয়াৰ কাষ চাপে ভুক্তভোগী যুৱকজনৰ পিতৃ-মাতৃ ৷

ইফালে যোৰহাট চিকিৎসালয়ত চিকিৎসাধীন যুৱকজনৰ বিস্ফোৰক মন্তব্য, ‘‘মই মটৰচাইকেলেৰে ৰাতি ঘৰলৈ গৈ আছিলোঁ ৷ তেনেতে বিপৰীত দিশৰ পৰা অহা এখন ডাম্পাৰ মোৰ কাষ চাপে ৷ তাৰ পাচতে ড্ৰাইভাৰ চিটৰ পৰা উঠি এজনে চোকা অস্ত্ৰৰে মোৰ সোঁহাত আক্ৰমণ কৰে ৷ লগে লগে মই বাইকৰ পৰা পৰি গৈছো ৷ তাৰ পাচতে ডাম্পাৰৰ পৰা নামি আহি কোইবাজনো লোকে মোক মাৰিছে ৷ তেতিয়াই মই অচেতন হৈ গ’লো ৷’’

আনহাতে সমগ্ৰ ঘটনাৰ সন্দৰ্ভত প্ৰতিক্ৰিয়া ব্যক্ত কৰে বিধায়ক মৃণাল শইকীয়াই ৷ তেওঁ কয়, ‘‘আৰক্ষী সম্পূৰ্ণ ৰূপে বিফল হৈছে ৷ চিচিটিভিত উক্ত দিনা ঘটনাস্থলীত ডাম্পাৰৰ চলাচল দেখা গৈছে ৷ তাৰ পাচতো কিয় আৰক্ষীয়ে তদন্ত কৰা নাই ! অতি দুৰ্ভাগ্যজনক ঘটনা এয়া ৷’’

লগতে পঢ়ক:Life struggle of two brothers: এখন চাইকেল; শাকৰ এটা মেটমৰা বোজা; দুই ভাইৰ জীৱন সংগ্ৰাম