গোলাঘাট, 27 জুনঃ ৰাজ্যত ভয়াৱহ ৰূপ ধাৰণ কৰিছে বান পৰিস্থিতিয়ে ৷ বানে সম্প্ৰতি সংকট কঢ়িয়াই আনিছে বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানলৈ ৷ ইতিমধ্যে বিধ্বংসী বানে প্লাৱিত কৰিছে ৰাষ্ট্ৰীয় উদ্যানখনৰ 50 শতাংশ অংশ ৷ ৰাষ্ট্ৰীয় উদ্যানখনৰ শতাধিক বনশিবিৰ এতিয়া বুৰাই পেলাইছে বানে ৷
ব্ৰহ্মপুত্ৰৰ ক্ৰমবৰ্ধমান জলস্তৰৰ বাবে এতিয়া প্লাৱিত হোৱাৰ দিশে কাজিৰঙা ৰাষ্ট্ৰীয় উদ্যানৰ মাজেৰে যোৱা 37 নং ৰাষ্ট্ৰীয় ঘাইপথো ৷ যাৰ বাবে এতিয়া প্ৰাণৰ সংকটত কাৰ্বি পাহাৰলৈ ঢাপলি মেলিছে ৰাষ্ট্ৰীয় উদ্যানখনৰ বন্যপ্ৰাণীয়ে ৷ জিলা প্ৰসাশনে বান পৰিস্থিতিৰ প্ৰতি লক্ষ্য ৰাখি 37নং ৰাষ্ট্ৰীয় ঘাইপথত যান-বাহন চলাচলত নিষেধাজ্ঞা আৰোপ কৰিছে যদিও,এতিয়াও অঞ্চলটোত যান-বাহন চলাচল অব্যাহত আছে বুলি জানিব পৰা গৈছে ৷ ইতিমধ্যেই ৰাষ্ট্ৰীয় ঘাইপথৰ পৰা বন বিভাগৰ লোকে উদ্ধাৰ কৰিছে কেইবাটাও পহু ৷