গোলাঘাট, 14 জুন : গোলাঘাট জিলাৰ মৰঙি মৌজাৰ বগীধলা চাহ বাগিচাত দেওবাৰে নিশা হাতীৰ গচকত এগৰাকী মহিলা থিতাতে নিহত হয় । নিহত মহিলাগৰাকী ৰীতা তাঁতী বুলি জানিব পৰা হৈছে ৷ আনহাতে হাতীৰ আক্ৰমণত মহিলাগৰাকীৰ ৮ বছৰীয়া সন্তান ৰূপম তাঁতী গুৰুতৰভাৱে আহত হয় । উল্লেখ্য যে, গোলাঘাট জিলাৰ মৰঙি মৌজাত দিনক-দিনে বৃদ্ধি পাইছে বনৰীয়া হাতীৰ উপদ্ৰৱ । দৈনিক হাতীৰ আক্ৰমণত ত্ৰাহি মধুসুদন সুঁৱৰিব লগা হৈছে স্থানীয় লোকে ।
দেওবাৰে ওৰে নিশা বনৰীয়া হাতীৰ জাকে বগীধলা চাহ বাগিচাৰ শ্ৰমিক লাইনত প্ৰৱেশ কৰি তাণ্ডৱ চলাই তিনিটাকৈ বাসগৃহ লণ্ড-ভণ্ড কৰে ৷ হাতীৰ জাকটোৱে সন্তানৰ সৈতে নিদ্ৰাৰত অৱস্থাত থকা ৰীতা তাঁতী নামৰ মহিলাগৰাকীৰ ঘৰত প্ৰৱেশ কৰি আক্ৰমণ কৰে ৷ হাতীৰ আক্ৰমণৰ ফলত মহিলাগৰাকী থিতাতে নিহত হয় । আনহাতে মহিলাগৰাকীৰ লগত শুই থকা ৮ বছৰীয়া সন্তান ৰূপম তাঁতী এই ঘটনাত গুৰুতৰভাৱে আহত হয় ।