পৱিত্ৰ ভাদ মাহ, হৰি নাম কীৰ্তনেৰে মুখৰিত শ্ৰী শ্ৰী আঠখেলীয়া নামঘৰ

বৈকুণ্ঠ পুৰীলৈ পৰিণত হ'ল ঐতিহ্যমণ্ডিত শ্ৰী শ্ৰী আঠখেলীয়া নামঘৰৰ চৌদিশ ।পৱিত্ৰ ভাদ মাহৰ শেষৰটো দেওবাৰ উপলক্ষে গোলাঘাটৰ ঐতিহ্যমণ্ডিত শ্ৰী শ্ৰী আঠখেলীয়া নামঘৰত ভকত বৈষ্ণৱৰ লানি নিচিগা সোঁত৷

গোলাঘাট, 15 ছেপ্টেম্বৰঃপৱিত্ৰ ভাদ মাহৰ শেষৰটো দেওবাৰ উপলক্ষে গোলাঘাটৰ ঐতিহ্যমণ্ডিত শ্ৰী শ্ৰী আঠখেলীয়া নামঘৰত অগণন ভকত বৈষ্ণৱে ভিৰ কৰিছে ৷ দেওবাৰে পুৱাৰে পৰাই আঠখেলীয়া নামঘৰত দেখা গ'ল ভকত বৈষ্ণৱৰ লানি নিচিগা সোঁত৷

জন বিশ্বাস আছে যে গোলাঘাটৰ ঐতিহ্যমণ্ডিত আঠখেলীয়া নামঘৰত পৱিত্ৰ ভাদ মাহত শৰাই নৈৱেদ্য আগবঢ়ালে আৰু বন্তি জ্বলাই নেদেখা জনৰ ওচৰত সেৱা ল'লে মনৰ আশা পূৰ্ণ হয় । সেয়ে গোলাঘাট জিলাৰ এই ঐতিহ্য মণ্ডিত আঠখেলীয়া নামঘৰলৈ আহিল দুৰ-দুৰণিৰ ভকত বৈষ্ণৱ । লক্ষ লক্ষ ভকত বৈষ্ণৱক আপ্যায়িত কৰিবলৈ নামঘৰ পৰিচালনা সমিতিৰ বিষয় ববীয়া সকলকো তৎপৰ দেখা গ'ল । উল্লেখ্য যে নামঘৰ পৰিচালনা সমিতিয়ে সমগ্ৰ ভাদ মাহত ৰাজ্য খনৰ লগতে উত্তৰপূৱৰ প্ৰায় 10 লক্ষাধিক ভকত বৈষ্ণৱৰ সমাগম হোৱাৰ আশা কৰি কাৰ্য সম্পাদন কৰি আহিছে । অসমৰ বিভিন্ন প্ৰান্তৰ পৰা অহা ভকত বৈষ্ণৱ সকলৰ যাতে কোনো অসুবিধা নহয় তাৰ বাবে গোলাঘাট আৰক্ষীৰ এটা দলেও দিনে নিশাই কৰ্তব্য পালন কৰি আহিছে৷