পেঞ্চাক চিলাট্ সংস্থাৰ খেলো ইণ্ডিয়াৰ প্ৰথম মহিলা লীগ
ধেমাজি, 28 আগষ্ট :সদৌ অসম পেঞ্চাক চিলাট্ সন্থা অসমৰ উদ্যোগত ধেমাজিৰ চিলাপথাৰৰ টাউন মহাবিদ্যালয়ত খেলো ইণ্ডিয়াৰ প্ৰথম মহিলা লীগ সম্পন্ন হয় ৷ তিনিশ ত্ৰিশ গৰাকী মহিলা খেলুৱৈৰ অংশ গ্ৰহণেৰে এই লীগ সম্পন্ন হয় ৷ আগন্তুক গোৱাত অনুষ্ঠিত হ’বলগীয়া ৩৭ সংখ্যক ৰাষ্ট্ৰীয় খেলত পেঞ্চাক চিলাট্ সমৰকলাৰ সংযোজনে দেশৰ বহু খেলুৱৈৰ বাবে বাট মুকলি কৰিলে নিজৰ নিজৰ পৰিচয় দাঙি ধৰাৰ ৷
প্ৰধানমন্ত্ৰী নৰেন্দ্ৰ মোদী নেতৃত্বাধীন চৰকাৰখনে দেশৰ ক্ৰীড়া ক্ষেত্ৰখনত পুৰুষৰ সমান্তৰালভাৱে মহিলা সকলেও যাতে সমানুপাতিকভাৱে বিভিন্ন খেলৰ জৰিয়তে আগুৱাই যাব পাৰে তাৰ প্ৰতি অধিক গুৰুত্ব প্ৰদান কৰিছে ৷ দেশৰ প্ৰান্তে প্ৰান্তে এতিয়া সমাদৃত হৈছে ইণ্ডোনেছিয় মূলৰ সমৰকলাৰ খেল পেঞ্চাক চিলাট্ ৷ এই খেলক ইতিমধ্যে আন্তৰাষ্টীয় পৰ্যায়ৰ লগতে ভাৰতবৰ্ষতো মান্যতা প্ৰদান কৰা হৈছে ৷