গোলাঘাট, ১ নৱেম্বৰ :কাজিৰঙাত আজিৰে পৰা আৰম্ভ হৈছে ২০২৩-২৪ পৰ্যটন বৰ্ষৰ হাতী ছাফাৰি । প্ৰত্যক বছৰে পহিলা নৱেম্বৰতহে আৰম্ভ কৰা হয় হাতী ছাফাৰি । আজি কাজিৰঙা ৰাষ্ট্ৰীয় উদ্যানৰ কহঁৰাৰ মিহিমুখত বিভাগীয় হাতী চাফাৰি ফিটা কাটি মুকলি কৰে কাজিৰঙা ৰাষ্ট্ৰীয় উদ্যানৰ ক্ষেত্ৰ সঞ্চালক ড৹ সোনালী ঘোষে ।
হাতী ছাফাৰি মুকলিৰ প্ৰথম দিনতে দেশীয় পৰ্যটকৰ লগতে দেখা গ’ল বিদেশী পৰ্যটকো । প্ৰথম দিনাই হাতীৰ পিঠিত উঠি কাজিৰঙাৰ মনোমোহা দৃশ্য তথা কাষৰ পৰা অসম গৌৰৱ দৰ্শন কৰি পৰ্যটকসকল আনন্দিত হৈ পৰে আৰু নিজৰ নিজৰ অভিজ্ঞতা সাংবাদিকৰ আগত প্ৰকাশ কৰে ।
‘‘হাতীত উঠি পানীৰাম ঘৰলৈ যায়, আলিবাটৰ মানুহে ঘূৰি ঘূৰি চাই ।’’ কাজিৰঙা ৰাষ্ট্ৰীয় উদ্যানৰ ইতিহাস আৰম্ভ কৰা কলিকতাৰ ভাইচৰয় লৰ্ড কাৰ্জনৰ পত্নী মেৰী কাৰ্জনে ১৯০৪ চনত কাজিৰঙাত দুষ্প্ৰাপ্য গঁড় চাবলৈ আহিছিল । তেওঁক হাতীত উঠাই কাজিৰঙাত গঁড় দেখুৱাবলৈ নিছিল নিগনা চিকাৰীয়ে । হাতীত উঠি কাজিৰঙা দৰ্শনৰ এয়া আছিল ইতিহাস ।
মেৰী কাৰ্জনে কিন্তু দেখিবলৈ পোৱা নাছিল এটাও গঁড় । নিগনা চিকাৰীয়ে দেখুৱাব পাৰিছিল মাত্ৰ গঁড়ৰ খোজ । লেডী কাৰ্জনে ঘূৰি গৈ লৰ্ড কাৰ্জনক কেৱল গঁড় সুৰক্ষাৰ বাবেই কাজিৰঙা অৰণ্য সংৰক্ষণৰ আহ্বান জনাইছিল । সেই অনুৰোধৰ বাবেই ১৯০৫ চনৰ ৬ জুনত "কাজিৰঙা প্ৰস্তাৱিত সংৰক্ষিত বনাঞ্চল" ঘোষণাৰ লগে লগে আৰম্ভ হৈছিল সংৰক্ষণৰ ইতিহাস ৷