গোলাঘাট, 7 আগষ্টঃ ওপৰত সূৰ্য দেৱতাৰ ৰুদ্ৰমূৰ্তি । তলত জনতাৰ ত্ৰাহি মধুসুদন । কোনোবাই যদি গছৰ তলত বহি গৰমৰ পৰা পৰিত্ৰাণ পোৱাৰ চেষ্টা কৰিছে আন একাংশৰ আকৌ কুঁহিয়াৰ ৰস , শীতল পানীয় , আইছক্ৰীম খাই শৰীৰ শীতলৰ প্ৰয়াস । কেৱল সেয়াই নহয় এফালে উৎকট গৰমত স্তব্ধ হৈ পৰিছে পাঠদান ।
একেৰাহে তিনি চাৰিদিন ধৰি সূৰ্য দেৱতা ৰুষ্ট হৈ থকাত এতিয়া কোনোফালে গৰমৰ পৰা পৰিত্ৰাণ পোৱা নাই ৰাজ্যবাসীয়ে । অতিপাত গৰমৰ বাবেই বুধবাৰে অৰ্ধছুটী দিয়া হ'ল গোলাঘাট জাতীয় বিদ্যালয় । এনেদৰেই গৰম চলি থাকিলে অন্যান্য বিদ্যালয় সমূহো ছুটী দিবলৈ উপায়ুক্তক আহ্বান জনাই গোলাঘাট জাতীয় বিদ্যালয়ৰ অধ্যক্ষগৰাকীয়ে৷ যাতে উৎকট গৰমৰ পৰা কিছু পৰিমাণে হ 'লেও পৰিত্ৰাণ পাব পাৰে ছাত্ৰ ছাত্ৰী সকলে ।