Golaghat Triple Murder case : চাঞ্চল্যকৰ হত্যাকাণ্ডৰ তদন্ত অব্যাহত

মঙলবাৰে অভিযুক্ত হত্যাকাৰী নাজিবুৰক লগত লৈ চিআইডিয়ে ঘটনা সন্দৰ্ভত অভিযান চলায় ৷ স্নিফাৰ ডগৰ সহায় তদন্তকাৰী দলটোৱে অভিযান চলাওঁতে গডৰেজৰ তলত লুকুৱাই থোৱা অৱস্থাত হত্যাকাণ্ড সংঘটিত কৰা দাখন উদ্ধাৰ কৰিবলৈ সক্ষম হয় ৷

যোৰহাট, 25 জুলাই : ৰাজ্য কঁপাইছে গোলাঘাটৰ ট্ৰিপল মাৰ্ডাৰে ৷ সোমবাৰে বিয়লি গোলাঘাটৰ মাজ মজিয়াত জোৱাঁয়েকে পত্নী, শাহু আৰু শহুৰক নৃশংসভাৱে দাৰে ঘপিয়াই হত্যা কৰিছিল ৷ এই ঘটনা সংঘটিত কৰিয়েই নিজৰ ন মহীয়া সন্তানটোক লগত লৈ ঘটনাস্থলীৰ পৰা পলায়ন কৰিছিল জোৱাঁয়েক নাজিবুৰে ৷

এই ঘটনা পোহৰলৈ অহাৰ পিচতে ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছিল ৷ ইফালে এই জঘন্য ঘটনা সংঘটিত কৰি সোমবাৰে নাজিবুৰ ৰহমান বৰাই সন্তানটিসহ গোলাঘাট সদৰ থানাত আত্মসমৰ্পণ কৰিছিল ৷ ইয়াৰ পিচত মঙলবাৰে অভিযুক্ত হত্যাকাৰী নাজিবুৰক লগত লৈ চিআইডিয়ে ঘটনা সন্দৰ্ভত অভিযান চলায় ৷ স্নিফাৰ ডগৰ সহায় তদন্তকাৰী দলটোৱে অভিযান চলাওঁতে গডৰেজৰ তলত লুকুৱাই থোৱা অৱস্থাত হত্যাকাণ্ড সংঘটিত কৰা দাখন উদ্ধাৰ কৰিবলৈ সক্ষম হয় ৷ সম্প্ৰতি দাখন উদ্ধাৰৰ পিচতে হত্যাকাণ্ডৰ ৰহস্য উদঘাটন বাবে যুদ্ধংদেহী তৎপৰতাৰে নামি পৰিছে তদন্তকাৰী দলটো ৷ তদন্তকাৰী দলটোৱে ঘটনা সংঘটিত কৰা স্থানত তন্নতন্নকৈ বিভিন্ন স্থান পৰীক্ষা কৰে ৷

জানিব পৰা অনুসৰি ইতিমধ্যে তদন্তকাৰী দলটোৱে উক্ত হত্যাকাণ্ডৰ বিভিন্ন তথ্যৰ সম্ভেদ পাইছে কিন্তু তদন্তৰ খাতিৰত মুখ খোলাৰ পৰা বিৰত আছে তদন্তকাৰী দলটো ৷ আনহাতে কোনো কাৰণত নগৰখনত যাতে অপ্ৰীতিকৰ পৰিস্থিতি উদ্ভৱ হ'ব নোৱাৰে তাৰ বাবে নিৰাপত্তা ব্যৱস্থা অধিক কটকটীয়া কৰি তোলা হৈছে ৷

ইফালে আজি অশ্ৰুসিক্ত নয়নেৰে পৰিয়ালটোৰ কণিষ্ঠা কন্যা অংকিতা ঘোষে পিতৃ সঞ্জীৱ ঘোষ, মাতৃ জুনু ঘোষ আৰু জ্যেষ্ঠ ভগ্নী সংঘমিত্ৰা ঘোষৰ অন্ত্যেষ্টিক্ৰিয়া সম্পন্ন কৰে ৷ তিনিটা চিতাতে মুখাগ্নি কৰি কান্দোনত ভাঙি পৰে অংকিতা ৷

লগতে পঢ়ক:Golaghat Triple Murder Update : পঞ্চভূতত বিলীন হ’ল সংঘমিত্ৰা, সঞ্জীৱ আৰু জুনুৰ নশ্বৰ দেহ