গোলাঘাটত দিন দুপৰতে ডকাইতি

গাড়ী ৰখাই ডকাইতে কাঢ়ি নিলে কুকুৰা সহ নগদ ধন ৷ এতিয়াও পলাতক ডকাইত পাপুলী আলী

গোলাঘাট, 13 জুলাইঃ গোলাঘাট হিন্দী স্কুল ৰোডত শনিবাৰে সংঘটিত হয় দিন ডকাইতিৰ ঘটনা। এখন বলেৰ পিক আপ ভানৰ চালক,কৰ্মচাৰী আৰু শ্ৰমিকক মাৰপিট কৰি ধন কাঢ়ি লোৱাৰ লগতে গাড়ী খনৰ প্ৰায় ৪০০ টা ব্ৰয়লাৰ মুৰ্গী কাঢ়ি লয় এটা ডকাইতে । ডকাইতটো পাপুলী আলী বুলি চিনাক্ত কৰিছে আৰক্ষীয়ে ৷ আনহাতে আৰক্ষীয়ে ডকাইতটোৱে কাঢ়ি নিয়া প্ৰায় ২৫০টা ব্ৰয়লাৰ মুৰ্গী উদ্ধাৰ কৰিবলৈ সক্ষম হয় ৷ AS-05C-4967 নম্বৰৰ এখন বলেৰ' পিক আপ ভানেৰে গমাৰিগুৰিৰ পৰা কঢ়িয়াই আনিছিল প্ৰায় ৪০০ টা ব্ৰয়লাৰ মুৰ্গী ৷

গোলাঘাট নগৰৰ হিন্দী স্কুল ৰোডত পূৰ্বৰে পৰা ৰৈ থকা ডকাইত পাপুলী আলীয়ে গাড়ী ৰখাই চালক জিতুল শইকীয়া,শ্ৰমিক খগেন বৰা আৰু জান বৰাক যধে মধে মাৰ পিট কৰিবলৈ ধৰে ৷ কেৱল মাৰপিটেই নহয় এজনৰ পেন্টৰ পকেটৰ পৰা প্ৰায় ১৫০০ টকাও কাঢ়ি লয় পাপুলী আলীয়ে । পিছত আৰক্ষীয়ে এটা গৃহৰ পৰা প্ৰায় ২৫০ টা ব্ৰয়লাৰ মুৰ্গী উদ্ধাৰ কৰে যদিও বাকী সমূহ ব্ৰয়লাৰ মুৰ্গী এতিয়াও উদ্ধাৰ কৰিব পৰা নাই ।