লাভলীনা বৰগোঁহাইৰ পিতৃ-মাতৃক গোলাঘাট জিলা প্ৰশাসনৰ সম্বৰ্ধনা

জাপানৰ টকিঅ'ত অনুষ্ঠিত হোৱা অলিম্পিকত ব্ৰঞ্জৰ পদক অৰ্জন কৰি সমগ্ৰ দেশৰ লগতে অসমলৈ গৌৰৱ কঢ়িয়াই অনা লাভলীনা বৰগোঁহাইৰ বাসগৃহত উপস্থিত জিলা উপায়ুক্ত সহ প্ৰশাসনৰ এটি দল ৷ লাভলীনাৰ পিতৃ-মাতৃক সম্বৰ্ধনা জ্ঞাপন কৰে দলটোৱে ৷

সৰুপথাৰ, 8 আগষ্ট :ছেমি ফাইনেলত পৰাজয় বৰণ কৰিও অসমৰ বাবে অলিম্পিকত নতুন যুগৰ সূচনা কৰিলে অসম কন্যা লাভলীনা বৰগোঁহাইয়ে । অসমৰ পৰা প্ৰথমবাৰৰ বাবে বিশ্ব ক্ৰীড়াৰ মহাৰণ অলিম্পিকলৈ গৈ মাত্ৰ 23 বছৰ বয়সতেই আঁজুৰি আনিলে ব্ৰঞ্জৰ পদক ৷ লাভলীনাৰ সফলতাত সমগ্ৰ ভাৰতবাসীৰ লগতে অসমবাসীও উৎফুল্লিত হৈ পৰিছে ৷

দেওবাৰে লাভলীনাৰ বাসগৃহত উপস্থিত হৈ পিতৃ-মাতৃক সম্বৰ্ধনা জনালে গোলাঘাট জিলাৰ উপায়ুক্তসহ জিলা প্ৰশাসনৰ এটি দলে ৷ দেওবাৰে লাভলীনা বৰগোহাঁইৰ ধনশিৰি মহকুমাৰ বৰপথাৰৰ বাৰমুখীয়া গাঁৱত থকা বাসগৃহত উপস্থিত হৈ খেলুৱৈ গৰাকীৰ পিতৃ-মাতৃক অভিনন্দন জ্ঞাপন কৰে গোলাঘাট জিলাৰ উপায়ুক্ত মৃগেশ নাৰায়ণ বৰুৱাৰ নেতৃত্বত যোৱা এটা দলে ৷

উপায়ুক্ত গৰাকীৰ লগত যোৱা দলটোত আছিল ধনশিৰি মহকুমাৰ মহকুমাধিপতি ৰাহুল জাভিৰ সুৰেশ আৰু জিলা তথা মহকুমা প্ৰশাসনৰ কেইবাগৰাকীও বিষয়া ৷ প্ৰশাসনৰ তৰফৰ পৰা খেলুৱৈগৰাকীৰ পিতৃ টিকেন বৰগোঁহাই আৰু মাতৃ মামণি বৰগোঁহাইক একোখনি ফুলাম গামোচা আৰু এখনি শৰাইৰে সম্ভাষণ জনোৱা হয় ৷

লগতে পঢ়কঃঅলিম্পিকৰ পদক বিজয়ী লৈ BYJU-ৰ বিশেষ উপহাৰ

ইপিনে সমগ্ৰ অসমবাসীৰ বুকু গৌৰৱেৰে ওফন্দাই তোলা অসমকন্যা লাভলীনাই সোমবাৰে দেশৰ মাটিত ভৰি দিব ৷ সোমবাৰে দিনৰ 3 বজাত লাভলীনাসহ অলিম্পিকত ভাগ লোৱা ভাৰতীয় খেলুৱৈৰ দলটো অৱতৰণ কৰিব দিল্লীৰ ইন্দিৰা গান্ধী আন্তৰ্জাতিক বিমান বন্দৰত । দেশৰ মাটিত ভৰি দিয়েই ভাৰতীয় দলটোৱে সাক্ষাৎ কৰিব দেশৰ ক্ৰীড়া মন্ত্ৰীক ৷

লাভলীনাক স্বাগতম জনাবলে সম্প্ৰতি দিল্লীত বাহৰ পাতি আছে অসমৰ ক্ৰীড়া আৰু যুৱ কল্যাণ মন্ত্ৰী বিমল বৰাৰ লগতে মুখ্যমন্ত্ৰী ড৹ হিমন্ত বিশ্ব শৰ্মাই ৷ দিল্লীত দুদিন কটাই 11 আগষ্টত নিজ মাতৃভূমি অসমলৈ আহিব লাভলীনা বৰগোহাঁই ৷ লাভলীনাক আদৰিবলৈ ইতিমধ্যে বৰঝাৰ বিমান বন্দৰৰ পৰাই আদৰিবলৈ চলিছে ব্যাপক প্ৰস্তুতি ৷

আনহাতে, 14 আগষ্টত লাভলীনা গুৱাহাটীৰ পৰা পুণৰ ৰাওনা হ’ব দিল্লীলৈ । 15 আগষ্টত স্বাধীনতা দিৱসৰ কাৰ্যসূচীত লাভলীনাসহ পদকপ্ৰাপ্ত সকলো খেলুৱৈকে সম্বৰ্ধনা জনাব প্ৰধানমন্ত্ৰীয়ে ।

লগতে পঢ়কঃলাভলীনা আহি আছে...