সৰুপথাৰ,৩ অক্টোবৰ:সদৌ গোলাঘাট জিলা ছাত্র সন্থাৰ অন্তৰ্গত অন্যতম শক্তিশালী মহকুমা ছাত্র সন্থা হৈছে ধনশিৰি মহকুমা ছাত্ৰ সন্থা । এই ধনশিৰি মহকুমা ছাত্ৰ সন্থাই অনুষ্ঠিত কৰা সম্বৰ্ধনা অনুষ্ঠানত সদৌ অসম ছাত্ৰ সন্থাৰ গোলাঘাট জিলাৰ নৱনিৰ্বাচিত সমিতিৰ সভাপতি গীতাৰ্থ শইকীয়া আৰু সাধাৰণ সম্পাদক বিশ্বজিৎ গগৈক সৰুপথাৰত সম্বৰ্ধনা জনোৱা হয় ৷ গোলাঘাট দক্ষিণ উন্নয়ন খণ্ডৰ সভাকক্ষত ধনশিৰি মহকুমা ছাত্ৰ সন্থাৰ উদ্যোগত অনুষ্ঠিত হোৱা সম্বৰ্ধনা অনুষ্ঠানটোৰ আঁত ধৰে ধনশিৰি মহকুমা ছাত্ৰ সন্হাৰ সাধাৰণ সম্পাদক মিণ্টু গগৈয়ে ৷
ধনশিৰি মহকুমা ছাত্ৰ সন্থাৰ সভাপতি বিকাশ বৰাই সভাপতিত্ব কৰা উক্ত গাম্ভীৰ্যপূৰ্ণ অনুষ্ঠানটোত আছুৰ মহকুমা সমিতৰ লগতে বৰপথাৰ, সৰুপথাৰ, উৰিয়ামঘাট, নাওজান, চুঙাজান, টেঙানি, গেলাবিল, বিলগাও আঞ্চলিক সমিতিৰ লগতে ধনশিৰি মহকুমা চুতীয়া ছাত্ৰ সন্থা, টাই আহোম ছাত্ৰ সন্থা, আটছাৰ সৰুপথাৰ আঞ্চলিক সমিতিৰ তৰফৰ পৰাও দুয়োগৰাকী সভাপতি সম্পাদকক সম্বৰ্ধনা জনোৱা হয় ৷
উক্ত সম্বৰ্ধনা অনুষ্ঠানটোত নৱগঠিত সভাপতি সম্পাদকৰ সৈতে উপস্থিত আছু কৰ্মী আৰু অন্যান্য জাতীয় সংগঠনৰ নেতা কৰ্মীসকলে এক মত বিননিময় অনুষ্ঠানো সম্পন্ন কৰে ৷ মত বিনিময় অনুষ্ঠানত থাকে গোলাঘাট জিলা সাংবাদিক সংস্থাৰ সম্পাদক তথা জ্যেষ্ঠ সাংবাদিক দ্বীপেন কুমাৰ বৰা । অসমীয়া জাতিৰ বাবে তথা ৰাইজৰ হকে আছুৱে কিদৰে সমুখৰ পৰা মাত মাতি সবল আৰু দৃঢ়ভাৱে কাম কৰি যাব সেই সন্দৰ্ভত মন্তব্য আগবঢ়াই ৷