দুৰ্নীতিৰ অভিযোগঃ গোলাঘাটত শ্ৰম মন্ত্ৰী সঞ্জয় কিষাণৰ প্ৰতিকৃতি দাহ

চাহ জনগোষ্ঠীৰ ছাত্ৰ-ছাত্ৰী সকলৰ স্ক'লাৰশ্বিপৰ নামত অহা ধন প্ৰদানত দুৰ্নীতি হোৱাৰ অভিযোগেৰে গোলাঘাট জিলা চাহ জনজাতি ছাত্র সন্থাই শনিবাৰে সাব্যস্ত কৰিলে এক প্ৰতিবাদ । চাহ জনগোষ্ঠীৰ ছাত্র ছাত্ৰী সকলৰ বাবে অহা স্ক'লাৰশ্বিপৰ ধন প্ৰদানৰ নামত ৰাজ্যৰ শ্ৰম মন্ত্ৰীগৰাকীৰ পৃষ্ঠপোষকতাত দুৰ্নীতি হৈ অহাৰ অভিযোগ তুলিলে এই সকল প্ৰতিবাদকাৰীয়ে ।

গোলাঘাট,২৫ জুলাই: ৰাজ্যত চাহ জনগোষ্ঠীৰ ছাত্ৰ-ছাত্ৰী সকলৰ স্ক'লাৰশ্বিপৰ নামত অহা ধন প্ৰদানত বৃহৎ দুৰ্নীতি কৰাৰ অভিযোগ ৰাজ্যৰ শ্ৰম মন্ত্ৰী সঞ্জয় কিষাণৰ বিৰুদ্ধে । মন্ত্ৰী গৰাকীৰ পৃষ্ঠপোষকতাত চাহ জনগোষ্ঠীৰ ছাত্ৰ-ছাত্ৰীৰ নামত অহা বিভিন্ন আঁচনিৰ ধন আত্মসাতৰ গুৰুতৰ অভিযোগ ।

উল্লেখযোগ্য যে,উচ্চ শিক্ষাৰ স্ক'লাৰশ্বিপৰ বাবে ১,০২৫ গৰাকী বাগানৰ শিক্ষার্থীক স্ক'লাৰশ্বিপ প্ৰদানৰ তালিকা প্ৰকাশ কৰাৰ পিছত বৰ্তমান কেৱল ৫১৭ গৰাকীক স্ক'লাৰশ্বিপ প্ৰদান কৰা হ'ব বুলি ঘোষণা কৰিছে । এই ক্ষেত্ৰত বাকী ৫০৭ গৰাকী ছাত্ৰ ছাত্ৰীক বঞ্চিত কৰি খোদ ৰাজ্যৰ শ্ৰম মন্ত্ৰী গৰাকীয়ে ধন আত্মসাৎ কৰাৰ এক ষড়যন্ত্ৰত লিপ্ত হোৱাৰ অভিযোগ তুলিছে ছাত্র সংগঠনটোৰ প্ৰতিবাদী সদস্য সকলে ।

দুৰ্নীতিৰ অভিযোগেৰে গোলাঘাটত ৰাজ্যৰ শ্ৰম মন্ত্ৰী সঞ্জয় কিষাণৰ প্ৰতিকৃতি দাহ

ইয়াৰ উপৰিও দয়াল দাস পানিকা স্ব-নিয়োজন আঁচনিৰ জৰিয়তে ১৪ হাজাৰ চাহ জনগোষ্ঠীৰ যুৱক-যুৱতীক আৰ্থিকভাৱে সাহায্য প্ৰদান কৰা কথা আছিল যদিও মাত্র পাঁচ হাজাৰ যুৱক-যুৱতীৰ এখন তালিকা প্ৰস্তত কৰাৰ বিষয়টোতো এক ৰহস্যৰ গোন্ধ পাইছে সংগঠনটোৱে ।

ৰাজ্যৰ বিজেপি নেতৃত্বাধীন চৰকাৰৰ প্ৰথমখন বাজেটত স্থান লাভ কৰিছিল চাহ বাগিচা অঞ্চলত ১১৯ খন বিদ্যালয় স্থাপন কৰাৰ । কিন্তু আজি পাঁচ বছৰে এখনো বিদ্যালয় স্থাপন নকৰাক লৈ তীব্ৰ ক্ষোভ ওজাৰে সংগঠনৰ সদস্যসকলে ।

এইসমূহ গুৰুতৰ অভিযোগেৰে গোলাঘাটৰ তেঁতেলি তলত ৰাজ্যৰ শ্ৰমমন্ত্ৰী সঞ্জয় কিষাণৰ প্ৰতিকৃতি দাহ কৰাৰ লগতে প্ৰতিবাদ সাব্যস্ত কৰিলে অসম চাহ ছাত্ৰ সন্থাৰ গোলাঘাট জিলা সমিতিয়ে ।

লগতে চাওকঃ মঙলদৈত বান বিধস্ত অঞ্চল পৰিদৰ্শন ৰিপুন বৰাৰ