গোলাঘাট,6 ডিচেম্বৰঃৰাজনৈতিক নেতা হিচাপে নহয়, এগৰাকী গায়ক ৰূপত মন্ত্ৰী অতুল বৰা । বোকাখাতৰ জাতীয় ঐক্য সমাৰোহত অগপৰ মুখপাত্ৰ কল্পনা পাটোৱাৰীৰ গীতৰ তালে তালে নৃত্য কৰিলে অসম গণ পৰিষদৰ সভাপতি তথা মন্ত্ৰী অতুল বৰাই । বোকাখাতৰ ৰাজহুৱা খেলপথাৰত অনুষ্ঠিত হোৱা বিশাল জাতীয় ঐক্য সমাৰোহত কেইবা হাজাৰ অসম গণ পৰিষদ দলৰ কৰ্মকৰ্তা আৰু ৰাইজ উপস্থিত থকা দেখা যায় ।
উল্লেখযোগ্য যে, ন-সাজেৰে, ন-উদ্যমেৰে এই জাতীয় ঐক্য সমাৰোহৰ আয়োজন কৰে বোকাখাট বিধান পৰিষদে । ইপিনে মন্ত্ৰী কেশৱ মহন্তই ভাষণ প্ৰসঙ্গত কয়, অসমত অগপৰ বৰ্তমানৰ মিত্ৰজোঁটৰ স্থিতিতেই আগন্তুক নিৰ্বাচনত অৱতীৰ্ণ হ'ব অগপই । আনহাতে কংগ্ৰেছ আৰু এআইইউডিএফৰ মিত্ৰতা অবৈধ আখ্যা দি মহন্তই কয়, এই অবৈধ মিত্ৰতাৰ জৰিয়তে জন্ম লাভ কৰা সন্তান অৰ্থাৎ চৰকাৰ ভৱিষ্যতে গুৰু গোসানী নামানে । কংগ্ৰেছ আৰু এআইইউডিএফে অসমত পানীহে ঘূলা কৰিব, মাছ ধৰিব নোৱাৰে । সম্প্ৰতি অগপ দলত হৈ থকা বিসম্বাদৰ সম্পৰ্কে তেঁও কয় যে প্ৰাৰ্থীত্ব প্ৰত্যাশীৰ বাবেই অগপত গঢ়াখহনীয়াৰ বিষয়টো উত্থাপিত হৈছে । নিৰ্বাচনৰ পূৰ্বে প্ৰতিটো ৰাজনৈতিক দলত প্ৰাৰ্থীত্ব প্ৰত্যাশী সকলে এটা দলৰ পৰা আনটো দললৈ গমন কৰে । ই এক স্বাভাৱিক প্ৰক্ৰিয়া ।