চমুৱা গাঁওলৈ গৌৰৱ কঢ়িয়ালে অভিষেকে

সদ্যঘোষিত হাইস্কুল শিক্ষান্ত পৰীক্ষাৰ ফলাফলত সংগীত বিষয়ত লেটাৰসহ 60 শতাংশ নম্বৰেৰে উজলি উঠিল চমুৱা গাঁওৰ অভিষেক বৰা নামৰ অন্ধ শিক্ষাৰ্থীগৰাকীয়ে ৷

গোলাঘাট, 18 মেঃ সদ্য ঘোষিত হাইস্কুল শিক্ষান্ত পৰীক্ষাত সংগীত বিষয়ত লেটাৰসহ 60 শতাংশ নম্বৰ লাভ কৰি প্ৰথম বিভাগত উত্তীৰ্ণ হৈছে গোলাঘাটৰ চমুৱা গাঁওৰ অন্ধ শিক্ষাৰ্থী অভিষেক বৰাই ৷ জন্মৰ পৰাই দুচকুৰে দেখা নোপোৱা শিক্ষাৰ্থীগৰাকীৰ ফলাফলক লৈ উৎফুল্লিত হৈ পৰিছে পিতৃ-মাতৃৰ লগতে গাঁওবাসী ৰাইজ ৷

পঢ়া-শুনাৰ লগতে সংগীতত ৰাপ থকা অভিষেকে সুন্দৰকৈ বজাব পৰা ঢোলকে ধৰি হাৰমনিয়াম আদি বাদ্যযন্ত্ৰ ৷ নিজৰ ফলাফলক লৈ খুবেই সুখী অভিষেকে যোৰহাট অন্ধ বিদ্যালয়ৰ পৰা হাইস্কুল শিক্ষান্ত পৰীক্ষাত অৱতীৰ্ণ হৈ এইদৰে সফলতা লাভ কৰিবলৈ সক্ষম হৈছে ৷