আছুক বিশৃংখলতাৰ ধ্বজ্জাবাহক আখ্যা বিধায়ক মৃণাল শইকীয়াৰ

জাতিৰ সংকটৰ সময়ত পুনৰ আছুক সমালোচনা বিধায়ক বিজেপি মৃণাল শইকীয়াৰ ৷ ক'লে আছুৰ কাৰণেই ৰাজ্যৰ চাৰিওফালে বিৰাজ কৰিছে কৰ্মহীনতা আৰু বিশৃংখলতা ৷ অখিল গগৈক বাংলাদেশী মুছলমানৰ পৃষ্ঠকোষক আখ্যা দিলে বিতৰ্কিত বিধায়ক গৰাকীয়ে ৷

গোলাঘাট, 10 ডিচেম্বৰ: অ-সংবিধানিক কেবক লৈ ৰাজ্যৰ চৌদিশে ব্যাপক প্ৰতিবাদ অব্যাহত থকাৰ মাজতে মঙলবাৰে নেছৰ অসম বন্ধৰ দিনটোতে আছুক পুনৰ আক্ৰমণৰ লক্ষ্য কৰি ল'লে খুমটাইৰ বিজেপি বিধায়ক মৃণাল শইকীয়াই ৷ ইটিভি ভাৰতৰ কেমেৰাৰ সন্মুখত এইবাৰ আছুক কৰ্মহীনতা আৰু বিশৃংখলতা ধ্বজ্জাবাহক আখ্যা দিলে বিধায়ক গৰাকীয়ে। সংগঠনটোক জাতিদ্ৰোহী আখ্যা দি বিধায়ক গৰাকীয়ে কয় যে যি সংগঠনে এটা জাতিক কৰ্মৰ পৰা বিৰত ৰাখে,বিশৃংখল হবলৈ উদ্গনি যোগায় সেই সংগঠন কেতিয়াও জাতীয় সংগঠন হব নোৱাৰে ৷ সংবিধান ৰক্ষাৰ কথা কোৱা আছুৱে বন্ধ,পথত টায়াৰ জ্বলোৱা,আদি উচ্চতম ন্যায়ালয়ে বন্ধ কৰি ৰখা কাৰ্যসূচীবোৰ কিয় হাতত লৈছে বুলিও বিতৰ্কিত মন্তব্য কৰে বিধায়কজনে ৷

আছুৱে মাদানী,আমছু, জমিয়ত উলেমাৰ লগত সুৰ একেই বুলিও অভিযোগ কৰে কেবক সমৰ্থন কৰি ৰাইজৰ ব্যাপক ককৰ্থনাৰ সন্মুখীন হোৱা বিধায়ক গৰাকীয়ে ৷ আছুৰ বজ্ৰনিনাদত মৃণাল শইকীয়াৰ বুকু নকপে বুলিও সংগঠনটোৰ প্ৰতি তীৰ্যক মন্তব্য কৰে মৃণাল শইকীয়াই ৷ একেদৰে কেবৰ বিৰোধিতা কৰাৰ বাবে কৃষক নেতা অখিল গগৈকো সমালোচনা কৰে গেৰুৱা দল বিধায়কজনে ৷ অখিল গগৈক অবৈধ বাংলাদেশী মুছলমানৰ ৰক্ষক আখ্যা দি খুমটাইৰ বিধায়কজনে কয় যে কাজিৰঙা ৰাষ্ট্ৰীয় উদ্যানৰ পৰা বাংলাদেশীক উচ্ছেদ কৰা সময়ত অখিল গগৈয়ে উচ্ছেদৰ বিৰোধিতা কৰিছিল গতিকে অখিল গগৈ বাংলাদেশীৰ পক্ষত থকা মানুহ ৷

আৰু পঢ়ক: কেবে জ্বলাইছে ৰাজ্য : প্ৰতিবাদৰ ক'লা ধোৱাই চানিছে অসমৰ আকাশ