গোলাঘাট,18 অক্টোবৰ: এইবাৰ গোলাঘাটতত সংঘটিত হৈছে এক সামাজিক বৰ্জন কাণ্ড ৷ আন ধৰ্মৰ যুৱকৰ সৈতে পৰকীয়া প্ৰেমৰ অভিযোগত গোলাঘাটৰ হাতীয়েখোৱা গাঁৱত ৰাইজে তিনিবছৰৰ বাবে বৰ্জন কৰিলে এটা পৰিয়ালক ৷ ঘটনা অনুসৰি একে গাঁৱৰে ৰশ্মি দত্ত নামৰ এগৰাকী বোৱাৰীৰ সৈতে অবৈধ প্ৰেমৰ সম্পৰ্ক আছিল গোলাঘাট মইনাপাৰাৰ ইজাজুল আলি নামৰ এজন ইছলামধৰ্মী যুৱকৰ ৷ যাৰ পৰিণতি স্বৰপে যোৱা ২৪ ছেপ্টেম্বৰত ৰশ্মিক পলুৱাই লৈ গৈছিল ইজাজুল আলি নামৰ অবৈধ প্ৰেমিকজনে ৷ কিছুদিন পাছতে ৰশ্মি দত্তক হত্যা কৰিছিল অভিযুক্ত ইজাজুল আলি নামৰ যুৱকজনে ৷ যোৱা 1 অক্টোবৰত ফৰকাটিংৰ শিঙিজান পথাৰত স্থানীয় লোকে অৰ্ধগলিত অৱস্থাত উদ্ধাৰ কৰে ৰশ্মি দত্তৰ মৃতদেহ ৷ উক্ত ঘটনাৰ কথা পোহৰলৈ অহাত আৰক্ষীয়ে ভণ্ড প্ৰেমিক ইজাজুলক গ্ৰেপ্তাৰ কৰি জেৰা চলাই য'ত ইজাজুলে ৰশ্মিক হত্যা কৰাৰ কথা স্বীকাৰ কৰে ৷ আৰক্ষীয়ে ৰশ্মিৰ মৃতদেহ পৰিয়ালক চমজাই দিয়াত হাতীয়েখোৱা গাঁৱৰ ৰাইজে মিলি মৃতদেহটো সৎকাৰ কৰে যদিও ইয়াৰ পাছতে ৰাইজৰ লেঠা লাগে ৷
এইবাৰ গোলাঘাটত সমাজে বহিস্কাৰ কৰিলে এটা পৰিয়ালক
ইছলামধৰ্মালম্বী এজন যুৱকে পলুৱাই নি হত্যা কৰিছিল হাতীয়েখোৱা গাঁৱৰ ৰশ্মি দত্ত নামৰ এগৰাকী বোৱাৰীক ৷ ঘটনাৰ পাছতে নামঘৰত ৰাইজমেল পাতি দুৰ্ভগীয়া ৰশ্মিৰ পৰিয়ালক তিনি বছৰৰ বাবে সমাজ বহিস্কাৰ কৰিলে ৰাইজে ৷
লগে লগেই হাতীয়েখোৱা গাঁৱৰ ৰাইজে নামঘৰত ৰাইজমেল পাতি ইছলামধৰ্মী লোকৰ সৈতে পৰকীয়া প্ৰেম কৰি মৃত্যু হোৱা ৰশ্মি দত্তৰ পৰিয়ালৰ লগতে খুড়াকৰ পৰিয়ালকো তিনিবছৰৰ বাবে সমাজৰ পৰা বহিস্কাৰ কৰাৰ কঠোৰ সিদ্ধান্ত গ্ৰহণ কৰে ৷ ইফালে মৃত ৰশ্মিৰ তিলনীৰ দিনা গাঁৱৰ ৰাইজ উপস্থিত নোহোৱাত এই বিষয়ে অৱগত হয় দুৰ্ভগীয়া পৰিয়ালটোৱে যাৰ ফলত এতিয়া ৰশ্মি দত্তৰ তিলনী,দহা,শ্ৰাদ্ধ আদি সম্পন্ন কৰাৰ ক্ষেত্ৰত ব্যাপক অসুবিধাৰ সন্মুখীন হৈছে পৰিয়ালটো ৷ একৈশ শতিকাৰ বিজ্ঞান-প্ৰযুক্তিৰ যুগটো এইদৰে ধৰ্ম আৰু প্ৰেমক সাঙুৰি এটা পৰিয়ালক সমাজত একলশৰীয়া কৰি তোলাটো কিমান যুক্তি সংগত তাক লৈ এতিয়া গোলাঘাটৰ সচেতন মহলত প্ৰশ্নৰ অৱতাৰণা হৈছে ৷ শেষত অসহায় পৰিয়ালটোৱে সাংবাদিকৰ যোগেদি গাঁৱবাসীয়ে তেওঁলোকৰ ওপৰত আৰোপ কৰা সমাজিক বহিস্কাৰ উঠাই ল'বলৈ অনুৰোধ জনাইছে ৷ উল্লেখযোগ্য যে,হাতীয়েখোৱাৰ এটা বিস্কুট কাৰখানাত ৰশ্মি দত্তৰে একেলগে কাম কৰিছিল ইজাজুল আলিয়ে ৷ প্ৰায় ডেৰ বছৰৰ পৰা দুয়োৰে মাজত আছিল অবৈধ প্ৰেমৰ সম্পৰ্ক ৷