মৃত্যু তিথিত ৰাজ্যজুৰি সোঁৱৰণ হস্তীৰ কন্যাক

শুকুৰবাৰে ৰাজ্যজুৰি উদযাপন কৰা হয় গোৱালপৰীয়া লোকগীতৰ সম্ৰাজ্ঞী পদ্মশ্ৰী প্ৰতিমা পাণ্ডে বৰুৱাৰ 17 সংখ্যক মৃত্যু দিৱস ৷ গৌৰীপুৰ, চাপৰৰ লগতে চানমাৰিতো শ্ৰদ্ধাঞ্জলী জ্ঞাপন কৰা হয় হস্তীৰ কন্যাৰূপে খ্যাত শিল্পীগৰাকীক ৷

নিউজ ডেক্স, 27 ডিচেম্বৰঃ শুকুৰবাৰে ৰাজ্যজুৰি উদযাপন কৰা হয় গোৱালপৰীয়া লোকগীতৰ সম্ৰাজ্ঞী পদ্মশ্ৰী প্ৰতিমা পাণ্ডে বৰুৱাৰ 17 সংখ্যক মৃত্যু দিৱস ৷ ৰাজ্যৰ ভিন্ন স্থানত বিভিন্ন কাৰ্যসূচীৰে সোঁৱৰণ কৰা হ'ল হস্তীৰ কন্যা হিচাপে পৰিচিত প্ৰতিমা পাণ্ডে বৰুৱাক ৷ শিল্পীগৰাকীৰ জন্মস্থান গৌৰীপুৰতো অভিনৱ কাৰ্যসূচীৰে 60 খন কৈ দোতাৰা বজাই শ্ৰদ্ধাঞ্জলি জ্ঞাপন কৰা হয় শিল্পীগৰাকীক ৷ গৌৰীপুৰ সাংস্কৃতিক কেন্দ্ৰৰ উদ্যোগত অনুস্থিত উক্ত অনুষ্ঠানত অংশগ্ৰহণ কৰে কণ-কণ শিশুৰ লগতে 60 গৰাকীকৈ জেষ্ঠ দোতোৰা শিল্পীয়ে ৷

সমান্তৰালকৈ ধুবুৰী জিলাৰ চাপৰতো শিল্পীগৰাকীক স্মৰণ কৰে গুণমুগ্ধই ৷ চম্পাৱতী প্ৰডাকচনৰ উদ্যোগত আয়োজিত এক অনুষ্ঠানত প্ৰতিমা পাণ্ডে বৰুৱাৰ আৱক্ষ মূৰ্তিত পুষ্পমাল্য অৰ্পন কৰে ৰাজহ চক্ৰ বিষয়া নৱজিৎ পাঠকৰ লগতে বিভিন্ন সংগঠনৰ সদস্য আৰু অঞ্চলটোৰ ৰাইজে ৷

আনহাতে, আছুৰ উদ্যোগত চানমাৰিস্থিত প্ৰতিমা পাণ্ডে বৰুৱাৰ প্ৰতিমূৰ্তিত শ্ৰদ্ধা নিবেদন কৰা হয় ৷ উল্লেখ্য যে, অসমৰ সাম্প্ৰতিক পৰিস্থিতিৰ বাবেই এই বৰ্ষত আছুৱে প্ৰদান নকৰে প্ৰতিমা বৰুৱা পাণ্ডে বঁটা ৷ এই অনুষ্ঠানত উপস্থিত থাকে আছুৰ মুখ্য উপদেষ্টা সমুজ্জল কুমাৰ ভট্টাচাৰ্য, সভাপতি দীপাংক নাথকে প্ৰমুখ্য কৰি বহু লোক ৷

লগতে পঢ়ক- ছত্তিশগড়ত ৰাষ্ট্ৰীয় আদিবাসী নৃত্য মহোৎসৱ