গোৱালপাৰা, ১৬ ফেব্ৰুৱাৰী : প্ৰধানমন্ত্ৰী গ্ৰাম চড়ক যোজনাৰ নামত গোৱালপাৰাত চৰম বিসংগতি। নিম্নমানৰ সামগ্ৰী ব্যৱহাৰ কৰি পথ নিৰ্মাণ কৰাৰ অভিযোগ ঠিকাদাৰ তথা গড়কাপ্তানি বিভাগৰ বিৰুদ্ধে।
পশ্চিম গোৱালপাৰা জিলাৰ লক্ষীপুৰৰ আমবাৰীৰ পৰা কাশীবাৰী সংযোগী পথৰ নিৰ্মাণত বিসংগতি সংঘটিত কৰাৰ অভিযোগ গড়কাপ্তানি বিভাগৰ বিৰুদ্ধে। পথছোৱা নিৰ্মাণৰ বাবে গোৱালপাৰা জিলা গড়কাপ্তানি বিভাগে দায়িত্ব প্ৰদান কৰিছিল ঠিকাদাৰ ৰাজীৱ আহমেদক। প্ৰধান মন্ত্ৰী গ্ৰাম চড়ক যোজনাৰ অধীনত ১,১৭,২৯,৯৯৯ টকা নিৰ্মাণ ব্যয় ধাৰ্য কৰিছিল বিভাগে। ২০১৭ বৰ্ষৰ ২৩ ডিচেম্বৰত কামৰ আৰম্ভণি কৰিছিল ঠিকাদাৰ গৰাকীয়ে। কিন্তু ঠিকাদাৰজনে পথছোৱা নিৰ্মাণৰ বাবে নিম্ন মানৰ সামগ্ৰী ব্যৱহাৰ কৰাত তীব্ৰ প্ৰতিক্ৰিয়াৰ সৃষ্টি হৈছে অঞ্চলটোত। চি চি ব্লক ব্যৱহাৰ কৰি নিৰ্মাণ কৰিবলৈ লোৱা পথছোৱাত কম দিনৰ ভিতৰতে পথছোৱা যে জহি খহি যাব সেয়া নিশ্চিত। আনকি নিৰ্মাণকাৰ্য পৰ্যৱেক্ষণ কৰিবলৈও আজিকোপতি দায়িত্বত থকা অভিযন্তা উপস্থিত নহল ঠাইখনত। যাৰ বাবে খঙত অগ্নিশৰ্মা হৈ উঠিছে অঞ্চলটোৰ জনসাধাৰণ। পথছোৱাৰ নিৰ্মাণকাৰ্য অনতিপলমে সম্পূৰ্ণ নকৰিলে প্ৰতিবাদী কাৰ্যসূচী গ্ৰহণ কৰাৰো হুংকাৰ প্ৰদান কৰে স্থানীয় ৰাইজে।
