গোৱালপাৰা,১৬ জানুৱাৰী: গোৱালপাৰাৰ ভালুকডুবি বাৰচেং পাৰাত দেওৰৰ প্ৰহাৰত প্ৰাণ গ'ল বৌৱেকৰ । জানিব পৰা মতে, শুকুৰবাৰে নিশা ৰাজীৱ ৰাভা আৰু ৰাজীৱৰ ভাতৃ ৰাজু ৰাভাৰ মাজত কাজিয়াৰ সূত্ৰপাত হয় । ৰাজীৱৰ পত্নী পদুলি ৰাভাই স্বামী আৰু দেওৰেকক কাজিয়া কৰাত বাধা দিয়াৰ চেষ্টা কৰে । কিন্তু তৰ্ক-বিতৰ্ক মাৰপিটলৈ পৰিণত হয় । এডাল বাঁহৰ লাঠিৰে ৰাজু ৰাভাই ককায়েক ৰাজীৱ ৰাভাক প্ৰহাৰ কৰিবলৈ উদ্যত হয় ।
সেই সময়তে পদুলি ৰাভাই বাধা দিবলৈ চেষ্টা কৰে আৰু দেওৰেকৰ হাতত থকা বাঁহৰ লাঠিৰ কোব পৰে পদুলি ৰাভাৰ বুকুত । লগে লগে পদুলি ৰাভা মাটিত ঢলি পৰে । তাৰ পিছতে হুলস্থুলীয়া পৰিস্থিতিৰ সৃষ্টি হয় । স্থানীয় লোকে তৎক্ষণাত পদুলি ৰাভাক গোৱালপাৰা অসামৰিক চিকিৎসলয়লৈ নিয়ে যদিও চিকিৎসকে মৃত বুলি ঘোষণা কৰে । ইয়াৰ পিছত চোলেছ হাস্পতাললৈও লৈ যোৱা হয় যদিও চিকিৎসকে পদুলি ৰাভাৰ মৃত্যু হোৱা বুলি পৰিয়ালৰ লোকক জনায় । ঘটনা সংঘটিত কৰিয়েই মূল অভিযুক্ত ৰাজু ৰাভাই পত্নীসহ উক্ত স্থানৰ পৰা পলায়ন কৰে ।