কৃষ্ণাইত চুলাইৰ বিৰুদ্ধে মহিলাৰ প্ৰতিবাদ

ঘৰে ঘৰে গৈ চুলাই ব্যৱসায়ীক সকীয়নী

গোৱালপাৰা, ২৬ ফেব্ৰুৱাৰী : যোৰহাট-গোলাঘাটৰ বিষাক্ত সুৰা সেৱন কৰি ডেৰ শতাধিক লোকে মৃত্যুক সাৱটিলোৱাৰ পাচতে কৃষ্ণাইৰ টুকুৰাত মঙলবাৰে হাতে হাতে চুলাই বিৰোধী বেনাৰ-প'ষ্টাৰ লৈওলাই আহিল শতাধিক মহিলা ।

অবৈধ চুলাইৰ ভাটি বন্ধ কৰক, চুলাই ব্যৱসায়ী আৰু আবকাৰী বিভাগৰ মিতিৰালি নচলিব ,আবকাৰী মন্ত্ৰী পৰিমল শুক্লবৈদ্য মুৰ্দাবাদ আদি শ্ল'গানেৰে উত্তাল কৰি তোলে টুকুৰা বজাৰৰ ৩৭নং ৰাষ্ট্ৰীয় ঘাইপথ । ইপিনে প্ৰতিবাদকাৰী মহিলাসকলে টুকুৰা বজাৰৰ আশে-পাশে থকা চুলাই ব্যৱসায়ীসকলৰ ঘৰে ঘৰে গৈ চুলাই ঘাটি ধ্বংস কৰাৰ লগতে চুলাইৰ উৎপাদন আৰু বিক্ৰী বন্ধ কৰিবলৈ সকীয়াই দিয়ে। লগতে এই অবৈধ চুলাই ঘাটিসমূহৰ ক্ষেত্ৰত ব্যৱস্থা গ্ৰহণ কৰিবলৈও আহ্বান জনায় আবকাৰী বিভাগ তথা চৰকাৰক ।