পঞ্চভূতত বিলীন বীৰ শ্বহীদ বাবলু ৰাভাৰ নশ্বৰ দেহ

সোমবাৰে গোৱালপাৰৰা দামৰাৰ আঞ্চলিক শ্মশান ঘাটত হাজাৰ হাজাৰ গুণমুগ্ধৰ উপস্থিতিত শেষকৃত সম্পন্ন কৰা হয় বীৰ শ্বহীদ বাবলু ৰাভাৰ ৷

গোৱালপাৰা, 5 এপ্ৰিল: এক শোকাকুল পৰিৱেশৰ মাজত গোৱালপাৰা জিলাৰ দামৰাৰ আঞ্চলিক শ্মশান ঘাটত সামৰিক মৰ্যাদাৰে শেষকৃত সম্পন্ন কৰা হয় শ্বহীদ বাবলু ৰাভাৰ ৷ শনিবাৰে ছত্তিশগড়ৰ বীজাপুৰত সেনাবাহিনীৰে হোৱা মাওবাদীৰ সংঘৰ্ষত শ্বহীদ হৈছিল চিআৰপিএফৰ কোব্ৰা ৰেজিমেন্টত কৰ্মৰত বাবলু ৰাভা ৷

দামৰাৰ আঞ্চলিক শ্মশান ঘাটত হাজাৰ হাজাৰ গুণমুগ্ধৰ উপস্থিতিত শেষকৃত সম্পন্ন কৰা হয় বীৰ শ্বহীদ গৰাকীৰ ৷ এই ঘটনাই শোকৰ ছাঁ পেলাইছে বৃহত্তৰ দুধনৈ, দামৰা অঞ্চলত ৷ বীৰ শ্বহীদ গৰাকীক লৈ গৌৰৱাম্বিত বুলি মন্তব্য অঞ্চলবাসীৰ ৷

উল্লেখ্য যে, ২০১১ চনত দেশ মাতৃৰ সেৱাৰ অৰ্থে চিআৰপিএফৰ কোব্ৰা ৰেজিমেন্টত যোগদান কৰিছিল বাবলু ৰাভাই ৷ সৰুৰে পৰা এটা সৰু জুপুৰি ঘৰৰ পৰাই দেশ মাতৃৰ সেৱাৰ সপোন দেখিছিল শ্বহীদ গৰাকীয়ে ৷ শ্বহীদ গৰাকীয়ে বিদায়ক্ষণত ইহ সংসাৰত এৰি থৈ যায় পত্নী, কণমানি কণ্যা, মাতৃ আৰু দুজন ভাতৃক ৷

দেশৰ বাবে শ্বহীদ হোৱা হোৱা বাবলু ৰাভাৰ পত্নী হোৱাৰ বাবে গৌৰাম্বিত বুলি কয় পত্নী লিপিকা ৰাভাই।

লগতে পঢ়কঃজাতীয় চেতনা আৰু সংগ্ৰামী সত্বাৰ গৰাকী হিৰণ্য ভট্টাচাৰ্য আৰু নাই