লক্ষীপুৰৰ গোৱল গাঁৱত বনৰীয়া হাতীৰ মৃত্যু

গোৱল গাঁৱত শুকুৰবাৰে পুৱতি নিশা মৃত্যু হয় এটি বনৰীয়া হাতীৰ ৷ অচিনাক্ত দূৰ্বৃত্তৰ দলে বিদ্যুৎ সংযোগী তাঁৰ আনি পথাৰৰ মাজৰ নলাৰ কাষত ৰখাৰ ফলত বিদ্যুৎপৰিবাহী তাঁৰত লাগি হাতীটোৰ মৃত্যু হয় ৷ ঘটনাস্থলীৰ পৰা বিদ্যুৎ সংযোগ কৰা বহু কেইটা বাঁহৰ খুটাও প্ৰত্যক্ষ কৰে স্থানীয় ৰাইজে ৷

গোৱালপাৰা,6নৱেম্বৰ: গোৱালপাৰা জিলাৰ লক্ষীপুৰ থানাৰ অন্তৰ্গত গোৱল গাঁৱত শুকুৰবাৰে পুৱতি নিশা এটি বনৰীয়া হাতীৰ মৃত্যু হয় ৷ লক্ষীপুৰ থানাৰ অন্তৰ্গত শিগৰী, বৰদল, পুখুৰীপাৰা,বাতাপাৰা,গোৱল আদি পাহাৰীয়া অঞ্চলত মেঘালয়ৰ পৰা অহা 20-22 জনীয়া হাতীৰ জাক এটাই সঘনাই উপদ্ৰৱ চলাই আছিল ৷ হাতীৰ জাকটোৱে বিগত ৩/৪ মাহৰ পৰা অঞ্চলটোত ত্ৰাস চলাই আছিল।

বনৰীয়া হাতীৰ জাকটোৱে শালি ধানৰ পথাৰত প্ৰৱেশ কৰি তহিলং কৰিছিল। কিছুদিন পূৰ্বে বাতাপাৰা গাঁৱৰ কাকো ৰাভাৰ পুত্ৰ তৰুণ ৰাভাক জাকটোৰ হাতীয়ে গচকি প্ৰাণ লৈছিল । আচাৰ্য্যজনক ভাৱে শুকুৰবাৰে পুৱা গোৱল গাঁৱৰ শ্মশানৰ ওচৰৰ খেতি পথাৰৰ মাজত থকা নলাত হাতীৰ জাকটোৰ বিশাল আকৃতিৰ মাইকী হাতী এটাৰ মৃতদেহ উদ্ধাৰ হয় ।

লক্ষীপুৰৰ গোৱল গাঁৱত বনৰীয়া হাতীৰ মৃত্যু

স্থানীয় ৰাইজে হাতীটোৰ মৃতদেহ প্ৰত্যক্ষ কৰাৰ পাছতে বনবিভাগ আৰু আৰক্ষীক খবৰ দিয়ে ৷ লক্ষীপুৰৰ বন বিষয়া শৰৎ দাস,আৰক্ষী বিষয়া,পশু চিকিৎসা বিষয়া,সমাজ কৰ্মী অঞ্জলিমা ব্ৰহ্ম,অশ্বিনী বসুমতাৰী ঘটনাস্থলীত উপস্থিত হয় ৷

লক্ষীপুৰৰ গোৱল গাঁৱত বনৰীয়া হাতীৰ মৃত্যু

স্থানীয় ৰাইজে অভিযোগ কৰা মতে,অচিনাক্ত দুৰ্বৃত্তৰ দলে বিদ্যুৎ সংযোগী তাঁৰ আনি পথাৰৰ মাজৰ নলাৰ কাষত ৰখাৰ ফলত বিদ্যুৎপৰিবাহী তাঁৰত লাগি হাতীটোৰ মৃত্যু হয় । ঘটনাস্থলীৰ পৰা বিদ্যুৎ সংযোগ কৰা বহু কেইটা সৰু বাঁহৰ খুটাও স্থানীয় ৰাইজে প্ৰত্যক্ষ কৰে । পিছত বন-বিষয়াৰ উপস্থিতিত হাতীৰ মৃতদেহটো পৰীক্ষাৰ অন্তত মাটিত পুতি থৈ দিয়ে ।

লগতে পঢ়ক:সৰ্বানন্দ সোণোৱাল জাতীয়তাবাদী নেতা নহয় : জগদীশ ভূঞা