পথ নিৰ্মাণত ব্যাপক দুৰ্নীতি গোৱালপাৰাত

দুৰ্নীতিৰ বিৰুদ্ধে মুখ্যমন্ত্ৰী সৰ্বানন্দ সোণোৱালৰ শূণ্য সহনশীল নীতি এক চূড়ান্ত ভেকোভাওনা৷ এমজিএনৰেগা আঁচনিৰ অধীনত নিৰ্মাণ হোৱা পকী পথ নিৰ্মাণত ভয়ংকৰ দুৰ্নীতি হোৱা পৰিলক্ষিত হৈছে গোৱালপাৰাত৷

গোৱালপাৰা, 21 আগষ্ট: দুৰ্নীতিৰ বিৰুদ্ধে মুখ্যমন্ত্ৰী সৰ্বানন্দ সোণোৱালৰ শূণ্য সহনশীল নীতি এক চূড়ান্ত ভেকোভাওনা৷ এমজিএনৰেগা আঁচনীৰ অধীনত নিৰ্মাণ হোৱা পকী পথ নিৰ্মাণত ভয়ংকৰ দুৰ্নীতি হোৱা পৰিলক্ষিত হৈছে গোৱালপাৰাত ৷ গোৱালপাৰা পূব সমষ্টিৰ অন্তৰ্গত গোলাম নবী হাউচৰ পৰা উচমানগণি হাউচ হৈ ডেকধৱা লৈ যোৱা পকী পথৰ নিৰ্মাণৰ বাবে গৰকপ্তানী বিভাগে আবন্টন দিছিল প্ৰায় দহ লাখ টকা৷ বিভাগটোৱে পথটোৰ নিৰ্মাণৰ দ্বায়িত্ব অৰ্পণ কৰিছিল পঞ্চায়ত সভানেত্ৰী ছালেহা বেগমৰ ওপৰত৷ কিন্তু ৰাইজক আশা-ভৰষাৰ হত্যা কৰি পথছোৱা নিৰ্মাণত চৰম দুৰ্নীতি কৰা পৰিলক্ষিত হ'ল ছালেহা বেগমে৷ পথছোৱা নিৰ্মাণত চেণ্ট গ্ৰেভাল আৰু শিল ব্যৱহাৰ কৰিব লাগিছিল যদিও ইয়াৰে এটাও ব্যৱহাৰ নকৰি কেৱল তিনি ট্ৰাক মাটি পেলাই কাম শেষ কৰিলে দ্বায়িত্বত থকা লোকসকলে৷

এমজিএনৰেগা আঁচনীৰ অধীনত 10 লাখ টকা গড়কাপ্তানী বিভাগে আৱণ্টন দিয়াৰ পিছতো পথছোৱা নিৰ্মাণৰ নামত অভিযন্তা তথা বিধায়ক ৰাছিদ আলমে চৰম দুৰ্নীতি কৰাৰ অভিযোগ উত্থাপন কৰিছে স্থানীয় ৰাইজে৷ ধনৰ লোভত বিষয়া কৰ্মচাৰী তথা বিধায়ক সকল মেনেজ হ'লেও ঠিকাদাৰ আৰু প্ৰাক্তন সভানেত্ৰী চালেহাৰ এনে ভয়ংকৰ দুৰ্নীতি মানি লবলৈ সাজু ডেকধৱাবাসী ৰাইজ৷ সেয়েহে ঠিকাদাৰ তথা পূব সমষ্টিৰ বিধায়ক একে ৰাছিদ আলমকে ধৰি আৰু পথটোৰ নিৰ্মাণৰ দ্বায়িত্বত থকা লোকসকলৰ বিৰুদ্ধে প্ৰতিবাদ সাব্যস্ত কৰে অঞ্চলটোৰ ৰাইজে৷

পথ নিৰ্মাণৰ নামত সংগঠিত দুৰ্নীতিৰ উচ্চ পৰ্যায়ৰ তদন্ত হোৱাৰ লগতে কঠোৰ ব্যৱস্থা গ্ৰহণ কৰাৰ দাবী উত্থাপন কৰে ডেকধৱাবাসী ৰাইজে ৷ পকীপথৰ নামত সংঘটিত এনে ভয়ংকৰ দুৰ্নীতিৰ বিৰুদ্ধে কোনো বিহীত ব্যৱস্থা গ্ৰহণ কৰা হ'ব নে নাই সেইয়া লক্ষণীয় হ'ব৷