গোৱালপাৰাত দুৰ্ঘটনা পতিত ভূটভূটি নাও

গোৱালপাৰা জিলাৰ টিয়াপাৰা চৰত ভূটভূটি নাও দুৰ্ঘটনা সংঘটিত হৈ এজনৰ মৃত্যু আৰু অন্য এজন সন্ধানহীন ৷

গোৱালপাৰা, 12 জুলাইঃ গোৱালপাৰা জিলাৰ টিয়াপাৰা চৰত আজি ভূটভূটি নাও দুৰ্ঘটনা সংঘটিত হৈছে । ব্ৰহ্মপুত্ৰৰ মাজমজিয়াত হঠাৎ যাত্ৰীবাহী ভূটভূটি খনৰ ছৈ ভাঙি পৰাত কেইবাজনো লোক পানীত পৰি যায় । লগে লগে কেইজনমান লোক সাঁতুৰি পাৰ হয় যদিও দুজন লোক সন্ধানহীন হৈ আছিল । ঘটনাস্থলীত SDRF বাহিনী উপস্থিত হৈ সন্ধানহীন লোক দুজনৰ এজনক মৃত অৱস্থাত উদ্ধাৰ কৰে । আনহাতে আন জন লোকৰ সন্ধানত SDRF বাহিনী উদ্ধাৰ অভিযান অব্যাহত ৰাখিছে যদিও এতিয়ালৈকে লোক জনৰ কোনো সন্ধান পোৱা নাই ।

নিহত লোক জনৰ নাম নুৰু শ্বেখ আৰু সন্ধানহীন লোকজনৰ নাম আব্দুল মান্নাফ বুলি জানিব পৰা গৈছে । উল্লেখযোগ্য যে, নামনি অসমৰ বিভিন্ন চৰ-চাপৰিত প্ৰায়ে এনে ভূটভূটি নাও দুৰ্ঘটনা সংঘটিত হোৱা দেখা যায় ।