গোৱালপাৰা,১২ নৱেম্বৰ:গোৱালপাৰা জিলাৰ বিভিন্ন প্ৰান্তত অব্যাহত আছে গৰু চোৰৰ উপদ্ৰৱ । জিলাখনৰ ৰামহৰি চৰকে ধৰি নিকটৱৰ্তী চৰাঞ্চলত গৰু চোৰৰ উপদ্ৰৱে ৰাইজক দীৰ্ঘদিন ধৰি অতিষ্ঠ কৰি আহিছে । এনে সময়তে দেওবাৰে পুৱতি নিশা তিনিমান বজাত ৰামহৰি চৰৰ গাঁওৰক্ষী বাহিনীয়ে গৰু চোৰৰ বিৰুদ্ধে এক অভিযান চলায় । উক্ত অভিযানত চাৰিটা সন্দেহযুক্ত চুৰি গৰুসহ তিনিটাকৈ গৰু বেপাৰীক আটক কৰে ।
আটকাধীন গৰু চোৰ কেইটাক গাঁওৰক্ষী বাহিনীয়ে পুৱাৰ ভাগত খৰমুজা আৰক্ষীক চমজাই দিয়ে । ৰামহৰি চৰৰ অভিযুক্ত আটকাধীন গৰু বেপাৰী কেইটা হ'ল ক্ৰমে আছুৰুদ্দিন, মইনুদ্দিন আৰু আছাদ আলী । গাঁওৰক্ষী বাহিনীৰ সম্পাদক ইছুৱ আলী আৰু সদস্য মকবুল হুছেইনে জানিবলৈ দিয়া অনুসৰি তিনিজনীয়া গৰু বেপাৰীৰ দল এটাই দেওবৰীয়া ডকাইদলৰ গৰু বজাৰলৈ বিক্ৰীৰ উদ্দেশ্য নিশা গোপনে চুৰি গৰু সৰবৰাহ কৰাৰ এক গোপন খবৰ শনিবাৰে সন্ধিয়াই লাভ কৰিছিল ।