ডিফু,১২ ফেব্ৰুৱাৰীঃ কাৰ্বি আংলঙৰ বন বিভাগৰ মুখ্য বন সংৰক্ষক অভিজিত ৰাভাৰ সীমাহীন সম্পত্তিৰ অভিযোগত কিছুদিন পূৰ্বে অসম চৰকাৰৰ দুৰ্নীতি নিবাৰক শাখাই বিষয়াগৰাকীৰ গুৱাহাটী আৰু ডিফুস্থিত কাৰ্যালয় আৰু বাসভৱনত তালাচী চলাইছিল ৷ বুধবাৰে পুনৰ বকলীয়াঘাটৰ ৩৬নং ৰাষ্ট্ৰীয় ঘাইপথৰ গাতে লাগি থকা বন বিভাগৰ কনিষ্ঠ সহায়ক ৰিকি কেওঁটৰ পিতৃগৃহত তালাচী চলায় তদন্তকাৰী দলটোৱে ৷ প্ৰায় এঘণ্টাজুৰি চলোৱা অভিযানত মহিলাগৰাকীৰ বাসগৃহৰ পৰা কি তথ্য লাভ কৰিলে সেয়া তদন্তকাৰী দলটোৱে সংবাদ মাধ্যমৰ আগত সদৰি কৰাৰ পৰা বিৰত থাকে ৷ দুৰ্নীতি নিবাৰক শাখাৰ এই অভিযানৰ বিষয়ে বকলীয়াঘাটত তীব্ৰ চাঞ্চল্যৰ সৃষ্টি হৈছে ৷
বকলীয়াঘাটত দুৰ্নীতি নিবাৰক শাখা উল্লেখ্য যে,পি চি চি এফ অভিজিৎ ৰাভা তদন্তৰ সন্মুখীন হোৱাৰ পিছত বিষয়াগৰাকীৰ অপকৰ্মৰ মুখা খোল খোৱাৰ সমান্তৰালকৈ উক্ত মহিলা কৰ্মচাৰী গৰাকীৰ কথায়ো চৰ্চা লাভ কৰিছে ৷ ৰাভাৰ বিপুল পৰিমাণৰ ক'লা ধন এইগৰাকী মহিলা কৰ্মচাৰীৰ জৰিয়তে লেনদেন হোৱাৰ আশংকা প্ৰকাশ কৰা হৈছে ৷ কাৰ্বি আংলঙৰ বন বিভাগৰ পশ্চিম সংমণ্ডলত কৰ্মৰত কৰ্মচাৰী গৰাকীক ডেপুটেছনত পি চি চি এফৰ পৰা বদলি কৰা হৈছিল বুলি এক সূত্ৰই সদৰি কৰে ৷ উক্ত দৃষ্টিকোণৰ পৰা মহিলা গৰাকী শীৰ্ষ বনবিষয়া গৰাকীৰ দুৰ্নীতিৰ সৈতে প্ৰত্যক্ষ বা পৰোক্ষভাৱে সাঙোৰ খাই পৰা সম্ভাৱনা নুই কৰিব নোৱাৰি ৷ অভিযানকাৰী দলটোৱে গুৱাহাটীৰ পৰা লৈ অহা ৰিকি কেওঁটক পুনৰ গুৱাহাটীলৈ লৈ যায় ৷ আনহাতে,প্ৰয়োজন সাপেক্ষে মহিলা কৰ্মচাৰী গৰাকীৰ বাসগৃহত অভিযান চলোৱাৰ সম্ভাৱনা আছে বুলি অভিযানকাৰী দলটোৱে জানিবলৈ দিয়ে ৷
লগতে চাওকঃবঙাইগাঁৱত বিদ্যুতস্পৃষ্ট হৈ দুষ্প্ৰাপ্য সোণালী বান্দৰৰ মৃত্যু
