ডিমা হাছাও,10 অক্টোবৰঃ উমৰাংচুৰ কপিলী জলবিদ্যুৎ প্ৰকল্পত সংঘটিত হোৱা ভয়াৱহ জলবিস্ফোৰণৰ চাৰিদিন ওকলি যোৱাৰ পাছতও প্ৰকল্পস্থলীলৈ ঘূৰি অহা নাই স্বাভাৱিক অৱস্থা ৷ জলবিস্ফোৰণৰ ফলত সম্পূৰ্ণৰূপে ব্যাহত হৈ পৰিছে প্ৰকল্পটিৰ বিদ্যুৎ উৎপাদন ৷ জল পৰিবাহী পাইপ লাইন ফাটি যোৱাৰ ফলত শ শ ফুট ওপৰত উঠিছে জলৰ ফোৱাৰা । এই জলবিস্ফোৰণৰ পিছত কপিলী জলবিদ্যুৎ প্ৰকল্পৰ নিপকোৰ পাৱাৰ হাউচৰ ৯০ শতাংশ কাৰিকৰী ব্যৱস্থা বিকল হৈ পৰিছে । অনিয়ন্ত্ৰিত পানীৰ সোঁতে প্ৰকল্পস্থলীৰ এখন দলং সম্পূৰ্ণৰূপে বিনষ্ট কৰি দিয়ে ৷ লগতে প্ৰকল্পটিত বিদ্যুৎ উৎপাদন বন্ধ হৈ যোৱাৰ ফলত ৰাজ্যত ব্যাপক বিদ্যুৎ সংকটে দেখা দিয়াৰ সম্ভাৱনা প্ৰকট হৈ পৰিছে । ইতিমধ্যে এনএইচপিচিকে আদি কৰি বিশেষজ্ঞৰ দল প্ৰকল্পস্থলীত আহি উপস্থিত হৈছে যদিও কপিলীৰ জলস্তৰ বৃদ্ধি হৈ থকাৰ ফলত কোনো প্ৰতিৰোধমূলক ব্যৱস্থা গ্ৰহণ কৰিব পৰা নাই ৷ কেনেকৈ এই জল বিস্ফোৰণ বন্ধ কৰিব তাক লৈ কোনোধৰণৰ পদক্ষেপ গ্ৰহণ কৰিব পৰা নাই নিপকো কৰ্তৃপক্ষই ।
ইতিমধ্যে ত্ৰিপুৰাৰ পৰা এনডিআৰএফ আৰু হোজাইৰ পৰা এছডিআৰএফৰ উদ্ধাৰকাৰী দল ঘটনাস্থলীত উপস্থিত হৈছে ৷ কিন্তু ঘটনা সংঘটিত হোৱাৰ চাৰিদিন পাৰ হৈ যোৱাৰ পিছতো সন্ধানহীন নিপকোৰ অভিযন্তাসহ চাৰিজন কৰ্মীক উদ্ধাৰ কৰিবলৈ সক্ষম হোৱা নাই উদ্ধাৰকাৰী দল দুটা । আনকি মিনিটত ১০ ছেন্টিমিটাৰ বৃদ্ধি পোৱা কপিলী নৈৰ জলস্তৰৰ বাবে উদ্ধাৰ অভিযান আৰম্ভ কৰিব পৰা নাই উদ্ধাৰকাৰী দলে । বৃহস্পতিবাৰে কপিলী জলবিদ্যুৎ প্ৰকল্প স্থল আৰু নিপকো পাৱাৰ হাউচ পৰিদৰ্শন কৰি পৰিস্থিতিৰ বুজ লয় উত্তৰ কাছাৰ স্বায়ত্ব শাসিত পৰিসদৰ চিইএম দেৱলাল গাৰ্লোছাই ৷ আনহাতে ডিমা হাচাও জিলাৰ উপায়ুক্ত অমিতাভ ৰাজখোৱাই বুধবাৰে ঘটনাস্থলী পৰিদৰ্শন কৰিছিল ৷