ডিমা হাছাও, 9 নৱেম্বৰ : অসম বহুমুখী সমবায় সমিতিৰ নামত হাফলঙত ধন সংগ্ৰহ কৰাৰ অভিযোগত আৰক্ষীৰ জেৰাৰ সন্মুখীন হ’বলগীয়া হৈছে প্ৰতিষ্ঠানটোৰ চাৰিগৰাকী কৰ্মী । হাফলঙৰ এখন হোটেলত বাহৰ পাতি অসম বহুমুখী সমবায় সমিতিৰ কৰ্মী বুলি পৰিচয় দি ধনসিং তিমুং, ঘনকান্ত মেহেলা, শ্ৰীবাছ চন্দ্ৰ নাথ আৰু বিজুলাল হাজাইছা নামৰ চাৰিগৰাকী ব্যক্তিয়ে শ্বেয়াৰ বিক্ৰী কৰাৰ নামত ধন সংগ্ৰহ কৰাৰ অভিযোগ উত্থাপন হয় ৷ এই অভিযোগৰ ভিত্তিত শনিবাৰে নিশা হাফলঙৰ হোটেলখনত আৰক্ষীয়ে অভিযান চলায় ।
হাফলং থানাৰ ভাৰপ্ৰাপ্ত বিষয়া ৰঞ্জিত শইকীয়াৰ নেতৃত্বত চলা এই অভিযানত আৰক্ষীৰ দলটোৱে কৰ্মী চাৰিগৰাকীৰ পৰা প্ৰতিষ্ঠানটোৰ সকলো কাগজ পত্ৰ লৈ যোৱাৰ লগতে তেওঁলোকৰ নাম ঠিকনা লিপিবদ্ধ কৰি লৈ যায় । জানিব পৰা মতে, প্ৰতিষ্ঠানটোৰ কৰ্মী চাৰিগৰাকীয়ে মুখ্যমন্ত্ৰী হিমন্ত বিশ্ব শৰ্মাই অসম বহুমুখী সমবায় সমিতিত অনুমোদন জনোৱা এখন পত্ৰ দেখুৱাই হাফলঙত বিভিন্ন লোকৰ পৰা ধন সংগ্ৰহ কৰিছিল ।