ডিমা হাছাও, 6 আগষ্ট : কৰ’ণা ভাইৰাছৰ প্ৰাদুৰ্ভাৱে স্থৱিৰ কৰি পেলাইছে মানুহৰ স্বাভাৱিক জীৱনযাত্ৰা ৷ ব্যৱসায় বাণিজ্যৰ লগতে ইয়াৰ ব্যাপক প্ৰভাৱ পৰা পৰিলক্ষিত হৈছে শিক্ষাব্যৱস্থাত ৷ লক্ ডাউনৰ বাবে ব্যাঘাত জন্মিছে শিক্ষাদান অথবা শিক্ষাগ্ৰহণ প্ৰক্ৰিয়াত ৷ সমগ্ৰ দেশতে অন লাইন পদ্ধতিৰে পাঠদান পথ অৱলম্বন কৰিব লগীয়া হৈছে ৷ কিন্তু অন লাইন প্ৰক্ৰিয়াই স্পৰ্শ কৰিব পৰা নাই দেশ তথা ৰাজ্যৰ বহু সংখ্যক অনগ্ৰসৰ অঞ্চল ৷ ইয়াৰ উদাহৰণ স্বৰূপে আমি ক'ব পাৰোঁ অসমৰ ডিমা হাছাও জিলাৰ কথা ৷
90- ৰ দশকত উগ্ৰপন্থী সমস্যাৰ বাবে উন্নয়ন স্তব্ধ হৈ পৰিছিল ডিমা হাছাও জিলাত । অৱশ্যে 2009 চনত ডিএইচডি জুৱেল গোট অস্ত্ৰ সম্বৰণ কৰি মূল সূঁতিলৈ ঘূৰি অহাৰ পাচত ডিমা হাছাও জিলাত লাহে লাহে উন্নয়নৰ কাম আৰম্ভ হৈছে ৷ তথাপিও কিন্তু এই পাহাৰীয়া জিলা খনৰ বিভিন্ন গ্ৰাম্যাঞ্চলত বৰ্তমানেও নাই সুগম পথ, নাই বিদ্যুৎ সেৱা, দুৰ্বল ম'বাইল নেটৱৰ্ক । জিলাৰ বিভিন্ন গাঁও সমূহৰ অন্তঃগাঁথনি ইমানেই দুৰ্বল যাৰ বাবে অনলাইন শিক্ষাৰ ক্ষেত্ৰত ছাত্ৰ-ছাত্ৰী সকল ব্যাপক সমস্যাৰ সন্মুখীন হৈছে ।
ৰাজ্যৰ অনগ্ৰসৰ এলেকাত প্ৰভাৱ পেলাব পৰা নাই অন্ লাইন শিক্ষাই হাফলংৰ পৰা 10 কিলোমিটাৰ দূৰত থকা ডিগ্ৰিক গাঁৱতো বহুতৰ নাই স্মাৰ্ট ফোন ৷ দুই এজনৰ স্মাৰ্ট ফোন থাকিলেও দুৰ্বল নেটৱৰ্ক আৰু বিদ্যুৎ সমস্যাৰ বাবে ডিগ্ৰিক গাঁৱৰ ছাত্ৰ-ছাত্ৰী সকলে অনলাইন শিক্ষা ল’ব পৰা নাই । অনলাইন শিক্ষাৰ পৰা কোনো ধৰণে লাভান্বিত হোৱা নাই এই অঞ্চলৰ ছাত্ৰ-ছাত্ৰী । তাৰোপৰি শিক্ষক-শিক্ষয়ত্ৰীসকলকো দিয়া হোৱা নাই অন লাইন পাঠদানৰ কোনোধৰণৰ প্ৰশিক্ষণ ৷ যাৰফলত পাঠদান কৰিবলৈ অপাৰগ হৈ পৰিছে অঞ্চলটোৰ শিক্ষক-শিক্ষয়ত্ৰীসকলো ৷
ডিমা হাছাও জিলাৰ গাঁও সমূহৰ অন্তঃগাঁথনি দুৰ্বল হোৱাৰ বাবে গাঁৱৰ ল’ৰা-ছোৱালী সকলোৱে অনলাইন শিক্ষা গ্ৰহণ কৰিব পৰা নাই বুলি অভিযোগ কৰে অভিভাবক সকলে ৷ ডিমা হাছাও মাত্ৰ এটা উদাহৰণহে ৷ অসমৰ চুকে-কোণে এনে বহু অঞ্চল আছে য’ত অন লাইন শিক্ষাই পৰ্ভাৱিত কৰিব পৰা নাই ছাত্ৰ-ছাত্ৰীক ৷ চৰকাৰে অন্ লাইন শিক্ষাৰ নিৰ্দেশ দিছে ঠিকেই ৷ কিন্তু পৰ্যাপ্ত সুবিধা অবিহনে এই ব্যৱস্থা কিদৰে ফলপ্ৰসূ হ’ব তাৰ উত্তৰ আছে নে চৰকাৰৰ হাতত ৷
লগতে পঢ়ক :কৰ'ণা মহামাৰীয়ে কোঙা কৰা এখন আদৰ্শ গাঁও!
