ডিমা হাছাও, ২৯ জানুৱাৰী :ডিমা হাছাও জিলাত তিনিটাকৈ আদৰ্শ অংগনৱাড়ী কেন্দ্ৰৰ মুকলি কৰে ৰাজ্যৰ শক্তি মন্ত্ৰী নন্দিতা গাৰ্লোচাই (Nandita Garlosa inaugurates Model Anganwadi Centre)। শনিবাৰে ডিমা হাছাও জিলাৰ অন্তৰ্গত ১৬ নং হাফলং জনজাতি বিধানসভা সমষ্টিৰ অধীনত কেলেলো পাংমুল আৰু ইনৰিম বাংলা গাঁৱত এই তিনিটা আদৰ্শ অংগনৱাড়ী কেন্দ্ৰ মুকলি কৰি ৰাজ্যৰ শক্তি মন্ত্ৰী নন্দিতা গাৰ্লোচাই কয় যে ২০২২-২৩ বিত্তীয় বছৰত চৰকাৰে ডিমা হাছাও জিলাত ১১ টা আদৰ্শ অংগনৱাড়ী কেন্দ্ৰ স্থাপন কৰিছে (Model Anganwadi Centre in Dima Hasao)।
মন্ত্ৰীগৰাকীয়ে লগতে কয় যে অহা বিত্তীয় বছৰত হাফলং বিধানসভা সমষ্টিত আৰু ২২ টা আদৰ্শ অংগনৱাড়ী কেন্দ্ৰ স্থাপন কৰা হ'ব । তেওঁ দাবী কৰা মতে চৰকাৰে শিশুসকলৰ বাবে উপযুক্ত পৰিৱেশ গঢ়ি তুলি প্ৰকৃত শিক্ষা প্ৰদানৰ লক্ষ্যৰে কাম কৰি আছে । শিশুসকলৰ মেধা বিকাশৰ বাবে চৰকাৰে ৰাজ্যত ৩ হাজাৰ আদৰ্শ অংগনৱাড়ী কেন্দ্ৰ স্থাপন কৰিছে ।
মন্ত্ৰী নন্দিতা গাৰ্লোচাই অংগনৱাড়ী কেন্দ্ৰ মুকলি অনুষ্ঠানত ভাষণ প্ৰসংগত কয় যে এই আদৰ্শ অংগনৱাড়ী কেন্দ্ৰসমূহত পঢ়া-শুনাৰ বাহিৰেও উন্নত মানৰ খাদ্য বিতৰণ কৰা হয় । শিশুসকলৰ প্ৰাথমিক শিক্ষা প্ৰদানৰ জৰিয়তে উজ্জ্বল ভৱিষ্যত গঢ়ি তোলাৰ লক্ষ্যৰে চৰকাৰৰ এই পদক্ষেপ বুলি মন্তব্য কৰি শক্তি মন্ত্ৰীগৰাকীয়ে কয় যে যোৱা বছৰৰ মে' আৰু জুন মাহত ডিমা হাছাও জিলা প্ৰাকৃতিক দুৰ্যোগৰ কৱলত পৰাৰ বাবে জিলাখনত আদৰ্শ অংগনৱাড়ী কেন্দ্ৰবোৰ নিৰ্মাণ কৰাৰ ক্ষেত্ৰত কিছু বিলম্ব হৈছে ।