ডিমা হাছাও, 23 ছেপ্টেম্বৰ : ডিমা হাছাওত এইবাৰ প্ৰৱঞ্চকৰ জাল । ঠিকাদাৰক জালত পেলোৱা প্ৰৱঞ্চক আৰক্ষীৰ জালত । বহিঃৰাজ্যৰ ঠিকাদাৰক ডিমা হাছাও জিলাৰ স্বাস্থ্য বিভাগ সমাজ কল্যাণ বিভাগ আৰু পঞ্চায়ত আৰু গ্ৰমোন্নয়ন বিভাগত কোটি কোটি টকাৰ ভুৱা ৱৰ্ক অৰ্ডাৰৰ নামত প্ৰৱঞ্চনা কৰাৰ অভিযোগত এগৰাকী প্ৰৱঞ্চক মৰনৈ থানাৰ অন্তৰ্গত গোৱালপাৰাৰ পৰা গ্ৰেপ্তাৰ কৰে হাফলং আৰক্ষীয়ে ।
বিজু দাস নামৰ এই প্ৰৱঞ্চক গৰাকীক হাফলং আৰক্ষীয়ে গোৱালপাৰাৰ পৰা হাফলং থানাত লৈ আহে । বহিঃৰাজ্য দিল্লী, মুম্বাই, বেংগালুৰুৰ ঠিকাদাৰক ভুৱা ৱৰ্ক অৰ্ডাৰ দি কোটি কোটি টকা আত্মসাৎ কৰাৰ অভিযোগ গুৱাহাটীৰ নৰেন্দ্ৰ সিং, বিবেক ফুকন আৰু বিজু দাসৰ বিৰুদ্ধে । প্ৰৱঞ্চক বিজু দাসক হাফলং আৰক্ষীয়ে গ্ৰেপ্তাৰ কৰে যদিও পলাতক আছে নৰেন্দ্ৰ সিং আৰু বিবেক ফুকন নামৰ আন দুই প্ৰৱঞ্চক ।
লগতে পঢ়ক:গৰুখুটিৰ উচ্ছেদ অভিযানত উত্তেজনা; আৰক্ষীৰ গুলীত নিহত দুজন
হাফলং থানাৰ পৰা প্ৰৱঞ্চক বিজু দাসক আদালত লৈ যোৱাৰ সময়তে সাংবাদিকৰ আগত প্ৰৱঞ্চক গৰাকীয়ে কয়, গুৱাহাটীৰ নিপন দহলীয়া, নৰেন্দ্ৰ সিং আৰু বিবেক ফুকন আৰু তেওঁ মিলি বেংগালুৰুৰ ভেংকটেছ পাই নামৰ এগৰাকী ঠিকাদাৰৰ পৰা ডিমা হাছাও জিলাৰ স্বাস্থ্য বিভাগৰ নামত 6 কোটি টকাৰ এখন ৱৰ্ক অৰ্ডাৰ দি 2 শতাংশ কমিচন অৰ্থাৎ 48 লাখ টকা লৈছিল । কিন্তু এই ৱৰ্ক অৰ্ডাৰ খন ভুৱা আছিল এই কথা গমপাই ভেংকটেছ পাইয়ে বেংগালুৰুৰ পৰা নিপন দহলীয়া আৰু নৰেন্দ্ৰ সিংৰ বেংক একাউণ্ট ব্লক কৰি ভাবুকি প্ৰদান কৰিছিল ৷