ডিমা হাছাও, ১৯ আগষ্ট: ডিমা হাছাওৰ দাওটুহাজা ৰে'ল ষ্টেচনত সংঘটিত গুলীচালনাৰ ঘটনাৰে কোন জড়িত আছে সেয়া পোহৰলৈ অহাৰ পূৰ্বেই এইবাৰ মাইবঙত সংঘটিত হ'ল গুলীয়াগুলিৰ ঘটনা । বৃহস্পতিবাৰ দিনৰ প্ৰায় ১১ বজাত মাইবঙত গুলীচালনাৰ ঘটনা সংঘটিত হয় । জানিব পৰা মতে, মাইবং মেঘ নাৰায়ণ দলঙত নাকা তালাচীৰ সময়তে সন্দেহযুক্ত ডি এন এল এ উগ্ৰপন্থী সংগঠনৰ ২ গৰাকী সদস্যই এখন বাইকেৰে সেই পথেৰে আহিছিল । কিন্তু আৰক্ষীক দেখি দুয়োজন সদস্যই বাইক সেই স্থানতে এৰি থৈ পলায়ন কৰাৰ চেষ্টা কৰে ।
কিন্তু আৰক্ষীয়ে এজন সদস্যক কৰায়ত্ত কৰিবলৈ সক্ষম হয় । আনহাতে আনজন সদস্য পলায়ন কৰিবলৈ সক্ষম হৈছে বুলি জানিব পৰা গৈছে । যোৱা কিছু দিনৰ পৰা মাইবং অঞ্চলত সক্ৰিয় হৈ উঠিছে ডিমাচা নেশ্যনেল লিবাৰেচন আৰ্মী । সম্প্ৰতি ডিমা হাছাও জিলাৰ আৰক্ষী অধীক্ষক জয়ন্ত সিঙে মাইবঙত বাহৰ পাতিছে ।
আনহাতে, বুধবাৰে নিশা প্ৰায় ১১.৩০ বজাত লামডিং-শিলচৰ ব্ৰডগজ ৰে'লপথৰ দাওটুহাজা ৰে'ল ষ্টেচনত গুলীয়াগুলিৰ ঘটনা সংঘটিত হয় । বুধবাৰে নিশা এই ঘটনা সংঘটিত হোৱাৰ পিছতে ষ্টেচনটো বন্ধ কৰি দিয়া হৈছে ।