"উপাসনা আধ্যাত্মিক কল-কৃষ্টি কেন্দ্ৰ" ভাওনা সংস্কৃতিয়ে দিছে স্বাৱলম্বিতাৰ পথ

পশ্চিমীয়া সংস্কৃতি নহয় , গুৰুজনাৰ অমৰ সৃষ্টি ভাওনা সংস্কৃতিৰ সাধকৰ ৰূপত টিংখাঙৰ যুৱক। এফালে ভাওনা সংস্কৃতিৰ প্ৰসাৰ আনফালে ভাওনা সংস্কৃতিৰ দ্বাৰাই স্বাৱলম্বিতাৰ পথ বাছি লৈছে টিংখাঙৰ একাংশ যুৱকে । চাওক এই সন্দৰ্ভত আমাৰ এক প্ৰতিবেদন ।

টিংখাং,2 নৱেম্বৰ : টিংখাঙত গুৰুজনাৰ অমৰ সৃষ্টি ভাওনা-সংস্কৃতিৰ প্ৰসাৰ ৷ যিসময়ত অসমীয়া সাহিত্য-সংস্কৃতিৰ প্ৰতি নৱ-প্ৰজন্ম উদাসীন বুলি সততে অভিযোগ উত্থাপিত হয় , তেনে সময়তে নীৰৱে ভাওনা সংস্কৃতিৰ প্ৰচাৰ-প্ৰসাৰত ব্ৰতী হৈছে টিংখাঙৰ একাংশ যুৱক । টিংখাঙৰ ৰতনপুৰ-কহাৰগাঁৱৰ একাংশ যুৱকে সৰুৰে পৰাই ভাওনা সংস্কৃতিৰ লগত জড়িত হৈ আহিছে ৷ দীৰ্ঘদিন ধৰি অসমৰ লগতে বহিঃৰাজ্যতো গুৰুজনাৰ অমৰ সৃষ্টিক তুলি ধৰাৰ প্ৰয়াস কৰি আহিছে এই যুৱকসকলে । ইয়াৰ বাবে তেওঁলোকে গঠন কৰি লৈছে " উপাসনা আধ্যাত্মিক কলা-কৃষ্টি কেন্দ্ৰ " হিচাপে এটা সাংস্কৃতিক দল । দলটোৰ নেতৃত্ব বহন কৰিছে কহাৰগাঁৱৰ যোগেশ শইকীয়া নামৰ এজন সংস্কৃতিবান যুৱকে । দলটোৱে ইতিমধ্যে অসমৰ বিভিন্ন স্থানত অৰ্ধ-শতাধিক ভাওনা প্ৰদৰ্শন কৰি ৰাইজৰ মৰম আৰু প্ৰসংশা বুটলিবলৈ সক্ষম হৈছে । কিছুদিন পূৰ্বে মধ্যপ্ৰদেশৰ ভূপাললৈ আমন্ত্ৰণ লাভ কৰিছিল শিল্পীৰ দলটোৱে । গুৱাহাটীৰ সংগীত গুৰু অতুল ভূঞাৰ নেতৃত্বত যোৱা দলটোৱে লোককলা মণ্ডল মিউজিয়ামত " গজকেতুৰ উপাখ্যান " নাটখনি পোন প্ৰথমবাৰৰ বাবে অসমীয়া ভাষাত প্ৰদৰ্শন কৰি ভূপালবাসীৰ বিপুল সমাদৰ লাভ কৰিবলৈ সক্ষম হয় ।

আনহাতে কেৱল ভাওনা প্ৰদৰ্শনেই নহয় , যোগেশ শইকীয়া নামৰ যুৱকজনৰ নেতৃত্বত গঢ়ি তুলিছে এটা ভাওনাৰ পোচাক ভাণ্ডাৰ । পোছাক ভাণ্ডাৰটোত আজৰি সময়ত 'উপাসনা আধ্যাত্মিক কলা-কৃষ্টি কেন্দ্ৰ'ৰ সমূহ সদস্যই বিভিন্ন ধৰণৰ ভাওনাৰ পোচাক , ভাওনাত ব্যৱহৃত অস্ত্ৰ , মুখা আদি নিজ হাতেৰে প্ৰস্তুত কৰে । লগতে অসমৰ বিভিন্ন প্ৰান্তত অনুষ্ঠিত হোৱা ভাওনালৈ ভাড়াত দিয়ে এইসমূহ সামগ্ৰী । ইয়াৰ বিনিময়ত দলটোৱে প্ৰতিভাগ নাটৰ পৰা লাভ কৰে ১০-২০ হাজাৰ টকা । ইয়াৰ পৰা উপাৰ্জিত হোৱা ধনেৰে কম বেছি পৰিমাণে স্বাৱলম্বী হোৱাত সহায় কৰিছে শিল্পীৰ দলটোক ।