'মৌ' পালনৰে স্বাভলম্বী টিংখাঙৰ বিনয় বৰা

'মৌ' পালনৰে স্বাভলম্বী টিংখাঙৰ বিনয় বৰা ৷ টিংখাঙৰ দুই নং গড়গুৰি গাঁৱৰ বিনয় বৰা নামৰ ব্যক্তিজনে 2018 চনৰ পৰাই ঘৰতে কাঠেৰে বাহ সাজি ব্যস্ত হৈ পৰিছে 'মৌ' পালনত ৷

টিংখাং, 1 চেপ্তেম্বৰঃ 'মৌ' পালনৰে স্বাভলম্বী টিংখাঙৰ বিনয় বৰা ৷ টিংখাঙৰ দুই নং গড়গুৰি গাঁৱৰ বিনয় বৰা নামৰ ব্যক্তিজনে 2018 চনৰ পৰাই ঘৰতে কাঠেৰে বাহ সাজি ব্যস্ত হৈ পৰিছে 'মৌ' পালনত ৷ বৰ্তমান বিনয় বৰাই ঘৰৰ চাৰিওফালে 12 টা মৌ-বাহ স্থাপন কৰি মৌ পালন কৰি আছে ৷ উল্লেখযোগ্য যে, কিছুদিন আগৰলৈকে তেওঁ ৪৮ টা মৌ বাহত মৌ পালন কৰি আহিছিল যদিও বৰ্তমান কেইবা বাহো মৌ জাক পলাই যায় ৷ মৌ ৰস উৎপাদন কৰা বিনয় বৰাই মৌ ৰস সংগ্ৰহ কৰি প্ৰতি লিটাৰ ৪০০ টকা দৰত বজাৰত বিক্ৰী কৰি আহিছে ৷ এনেদৰে বছৰি তেখেতে পঁচিশৰ পৰা ত্ৰিশ হাজাৰ টকা অকল মৌ পালনৰ পৰাই সংগ্ৰহ কৰিবলৈ সক্ষম হয় ৷

ইফালে শিল্পৰ কৰ্মৰ কোনো আনুষ্ঠানিক শিক্ষাৰ অবিহনে কঠোৰ অধ্যৱসায় আৰু একাণপটীয়া নেৰা নেপেৰা প্ৰচেষ্টাৰে পেলনীয়া বাঁহ, কাঠৰ, টুকুৰাৰে বিভিন্ন ঘৰুৱা সামগ্ৰী নিৰ্মাণৰ কামতো আন্তৰিকতাৰে মনোনিৱেশ কৰে বিনয় বৰাই ৷ তেওঁৰ হাততে আকৰ্ষণীয়ৰূপে প্ৰাণ পাই উঠা ঘৰুৱা সৌন্দৰ্যবৰ্ধনৰ বিভিন্ন সামগ্ৰীয়ে দিনক দিনে যথেষ্ট সমাদৰ লাভ কৰিবলৈ সক্ষম হৈছে ৷