দুলীয়াজানত বনৰীয়া হাতীৰ তাণ্ডৱ

পূৰ্বৰ আমাজন দিহিং পাটকাইৰ ওচৰৰ অঞ্চলত বনৰীয়া হাতীৰ তাণ্ডৱ ৷ খাদ্যৰ নাটনিত বনৰীয়া হাতীৰ জাক এটা ওলাই আহি ওচৰৰ গাঁৱত মুক্ত বিচৰণ কৰাত ভয়াৱহ পৰিস্থিতিৰ সৃষ্টি হয় ।

মৰাণ,17 এপ্ৰিল: ৰাজ্যত দিনক দিনে বাঢ়িব ধৰিছে বন্যহস্তীৰ তাণ্ডৱ ৷ হাতী-মানুহৰ সংঘাতে ক্ৰমাৎ জটিল ৰূপ ধাৰণ কৰিছে ৷ পূৰ্বৰ আমাজন দিহিং পাটকাইত ঠাই নোহোৱা হৈছে বনৰীয়া হাতীৰ ৷ ওচৰৰ অঞ্চললৈ এজাক বনৰীয়া হাতীয়ে খাদ্যৰ সন্ধানত ওলাই অহাত এক ভয়ংকৰ পৰিস্থিতিৰ সৃষ্টি হয় অঞ্চলটোত ৷ বিহুৰ আনন্দ-উল্লাসৰ মাজতে বনৰীয়া হস্তীৰ জাকে ওচৰৰ গাঁৱসমূহত মুক্ত বিচৰণ কৰাত ৰাইজ চিন্তিত হৈ পৰে ৷ দুলীয়াজানৰ ভাদৈ পাঁচআলিৰ নগাজানত প্ৰায় 7-8 টা বনৰীয়া হাতীৰ জাকক ৰাইজে অতি কষ্টেৰে খেদি পঠিয়াবলৈ সক্ষম হয় ।

উল্লেখ্য যে, দিহিং পাটকাই বনাঞ্চলত বন মাফিয়াই মুক্তভাৱে এফালৰ পৰা মূল্যবান গছ কাটি প্ৰকৃতিৰ প্ৰতি ভাবুকি কঢ়িয়াই অনাৰ পৰিপ্ৰেক্ষিততে বনাঞ্চলৰ পৰা ওলাই আহিছে জাকে জাকে বনৰীয়া হাতী । এই ক্ষেত্ৰত বন বিভাগে কোনো ধৰণৰ ব্যৱস্থা গ্ৰহণ নকৰাৰ অভিযোগ উঠিছে ৷

লগতে পঢ়ক : অসমত নতুনকৈ ৫৭৩ গৰাকী লোক ক'ৰনাত আক্ৰান্ত