মৰাণ, ১৮ এপ্ৰিল:আৰক্ষীয়ে গৰুৰ চোৰাং সৰবৰাহৰ বিৰুদ্ধে কঠোৰ স্থিতি গ্ৰহণ কৰাৰ পিচতো অব্যাহত আছে গৰু-ম’হৰ চোৰাং বেহা (Cattle smuggling in Assam) ৷ কঠোৰ স্থিতি গ্ৰহণৰ পিচতো কেৱল নিশাই নহয়, দিন-দুপৰতো কৌশলৰে সৰৱৰাহ কৰি আহিছে গৰু-ম’হ ৷ এতিয়া বিলাসী বাহনেৰেও গৰু সৰবৰাহত নামিছে অসাধু চক্ৰ ৷ ৰাজ্য়ৰ আন ঠাইৰ লগতে ডিব্ৰুগড় জিলাতো ব্যাপকভাৱে বৃদ্ধি হৈছে গৰুৰ চোৰাং বেহা ৷
ডিব্ৰুগড় জিলাৰ লাহোৱালৰ চাউলখোৱাত এটা বৃহৎ গৰু চুৰি চক্ৰই দীৰ্ঘদিনৰ পৰা আৰক্ষীৰ চকুত ধূলি মাৰি ন ন কৌশলৰে চোৰাং গৰু সৰবৰাহ কৰি আহিছে (Smuggled cattle seized at Lahowal)। ইয়াৰ মাজতেই সোমবাৰে নিশা AS-06-G7149 নম্বৰৰ এখন বিলাসী বাহনত জব্দ চোৰাং গো ধন । সৰবৰাহকাৰীয়ে তিনিজনী গাই লৈ ডিব্ৰুগড় অভিমুখে আহি থাকোতেই বাহনখনৰ ওপৰত আৰক্ষীৰ সন্দেহ ঘনীভূত হয় ।
লাহোৱাল থানাৰ আৰক্ষীয়ে এই দলটোক বকুল বাইপাছৰ ৰ'টাৰীৰ সমীপৰ পৰা বাহনখনক খেদি যায় যদিও চোৰকেইটাই আৰক্ষীয়ে খেদি যোৱাৰ উমান পাই বাহনখন বাইপাছৰ খাৱৈত নমাই আন্ধাৰৰ সুযোগ বুজি পলায়ন কৰে । আৰক্ষীয়ে বাহনখনৰ পৰা তিনিজনী গাই আৰু তিনিটা ম'বাইল ফোন উদ্ধাৰ কৰাৰ লগতে বাহনখন জব্দ কৰি নিশাৰ পৰা চোৰ কেইটাৰ সন্ধানত নামি পৰিছে ৷