মৰাণ, 18 ফেব্ৰুৱাৰী : ডিব্ৰুগড় জিলাৰ টিংখাঙৰ কেন্দুগুৰি গাঁও পঞ্চায়তৰ সভানেত্ৰী পবিত্ৰা সিং বকলিয়ালৰ বিৰুদ্ধে চৰম অনিয়ম আৰু বঞ্চনাৰ অভিযোগ তুলি বৃহস্পতিবাৰে টিংখাং উন্নয়ন খণ্ড আৰু আঞ্চলিক পঞ্চায়তৰ কাৰ্যালয়ত পঞ্চায়তটোৰ ভালেসংখ্যক ৰাইজে উত্তাল প্ৰতিবাদ সাব্যস্ত কৰে । পঞ্চায়তটোত প্ৰধানমন্ত্ৰী আৱাস যোজনা আৰু অন্যান্য চৰকাৰী উন্নয়নমূলক আঁচনি ৰূপায়ণত ব্যাপক দুৰ্নীতি সংঘটিত হোৱা বুলি অভিযোগ উত্থাপিত কৰে প্ৰতিবাদী ৰাইজে ।
প্ৰতিবাদকাৰীসকলে সভানেত্ৰীগৰাকীৰ বিৰুদ্ধে উচিত তদন্তৰ দাবী তুলি টিংখাং খণ্ড উন্নয়ন বিষয়াক এখন স্মাৰকপত্ৰ দাখিল কৰে । আনহাতে পঞ্চায়ত সভানেত্ৰীগৰাকীৰ বিৰুদ্ধে চৰম মইমতালিৰ অভিযোগ তুলিছে খোদ পঞ্চায়তটোৰ কেইবাগৰাকী ৱাৰ্ড সদস্যই । যিকোনো চৰকাৰী আঁচনিৰ কামত ৱাৰ্ড সদস্যসকলক বঞ্চিত কৰি সভানেত্ৰী পবিত্ৰা সিং বকলিয়ালে নিজেই সকলো সিদ্ধান্ত গ্ৰহণ কৰা বুলি অভিযোগ উত্থাপন কৰে এইসকল ৱাৰ্ড সদস্যই ।