ডিব্ৰুগড়, 31 অক্টোবৰ:লক্ষ্মী পূজাক ৰাজনৈতিক সভালৈ ৰূপান্তৰিত কৰা আৰু ভুল তথ্যৰে অপপ্ৰচাৰ চলোৱাৰ অভিযোগ অজাপৰ সভাপতি লুৰিণজ্যোতি গগৈৰ বিৰুদ্ধে ৷ অসম জাতীয় পৰিষদৰ সভাপতি লুৰিণজ্যোতি গগৈৰ বিৰুদ্ধে সংবাদমেল আয়োজন কৰা হয় ডিব্ৰুগড় জিলাৰ টিংখাঙত ৷ টিংখাং বিজেপিয়ে সোমবাৰে সম্বোধন কৰে এই সংবাদমেলৰ ৷
লক্ষ্মী পূজাৰ মাংগলিক অনুষ্ঠানক ৰাজনৈতিক মঞ্চ হিচাপে ব্যৱহাৰ কৰাক লৈ তীব্ৰ প্ৰতিক্ৰিয়া প্ৰকাশ কৰিছে টিংখাং বিজেপিয়ে । লক্ষ্মী পূজাৰ দৰে পবিত্ৰ সামাজিক অনুষ্ঠান এটাত অজাপৰ সভাপতিগৰাকীয়ে ৰাজনৈতিক ভাষণ প্ৰদান কৰাৰ লগতে দলীয় যোগদান কাৰ্যসূচীলৈ ৰূপান্তৰিত কৰা কাৰ্য অতি নিন্দনীয় বুলি সংবাদমেলত টিংখাং বিজেপিয়ে জাতীয়তাবাদী নেতাগৰাকীক গৰিহণা দিয়ে ।
উল্লেখ্য যে, যোৱা 28 তাৰিখৰ দিনা টিংখাঙৰ চপাতলি গাঁৱত ন-পুখুৰী যুৱক সংঘৰ উদ্যোগত অষ্টম বাৰ্ষিক লক্ষ্মী পূজা অনুষ্ঠিত হৈছিল । উক্ত অনুষ্ঠানত সাংস্কৃতিক অনুষ্ঠানৰ উদ্ধোধক হিচাপে উপস্থিত থকা লুৰিণজ্যোতি গগৈৰ উপস্থিতিত অজাপে যোগদান কাৰ্যসূচী চলোৱাৰ অভিযোগ তুলিছে স্থানীয় ৰাইজে । উক্ত অনুষ্ঠানত দিল্লীবাৰী পঞ্চায়তৰ বিজেপি নেতা কৰ্মীসহ প্ৰায় পাঁচ শতাধিক লোকে অজাপত যোগদান কৰা বুলি সংবাদ মাধ্যমৰ আগত উল্লেখ কৰিছিল লুৰিণজ্যোতি গগৈয়ে । লগতে সংবাদ মাধ্যমযোগে দেখিবলৈ পোৱা গৈছিল সেই পৰিৱেশ ৷