ডিব্ৰুগড়,12 মাৰ্চঃ অনন্য আৰু বিশাল মনৰ পৰিচয়ৰে অভিনেত্ৰী প্ৰস্তুতি পৰাশৰ নতুন প্ৰস্তুতি । অসমৰ চুকে-কোণে থকা অভিনয় প্ৰতিভাক নিজৰ পৰিচালনাৰ প্ৰথমখন বোলছবিত অভিনয়ৰ সুযোগ দিব সুদক্ষ অভিনেত্ৰী প্ৰস্তুতিয়ে । অভিনেত্ৰী প্ৰস্তুতিৰ নিজা পৰিচালনাত আগন্তুক এপ্ৰিলৰ পৰা শ্বুটিং আৰম্ভ হ'ব লগীয়া বোলছবি ৰাজকুমাৰীত সুযোগ দিব অসমত সিঁচৰতি থকা সকলো বয়সৰ অভিনয় প্ৰতিভাক । তিনি বছৰীয়া শিশু, কিশোৰৰ লগতে যি সকল লোকৰ সুকীয়া অভিনয় প্ৰতিভা আছে, কিন্তু অখ্যাত অৱস্থাত লুকাই আছে তেওঁলোকক ৰাইজৰ মাজত চিনাকি কৰাই দিয়াৰ লক্ষ্য অভিনেত্ৰী গৰাকীৰ।
নতুন ছবি নিৰ্মাণ কৰিব প্ৰস্তুতিয়ে আজি ডিব্ৰুগড়ত সংবাদ মেল পাতি উজনিৰ এনে প্ৰতিভা বিচাৰি যোৰহাটৰ থিয়েতাৰ হোলত আৰম্ভ হ'ব লগীয়া অডিচনৰ বিষয়ে সবিশেষ জনাই মোহময়ী অভিনেত্ৰী গৰাকীয়ে। অডিচন সম্পৰ্কে সংবাদ মাধ্যমৰ যোগেদি অসমৰ ৰাইজক অৱগত কৰি আজি ছবিখনৰ বিষয়েও সবিশেষ জনালে প্ৰস্তুতিয়ে।ইফালে চিলেক্টচন হৈ অৱশিষ্ট হিচাপে ৰৈ যোৱা সকলকো আগন্তুক সময়ত আগবঢ়াই নিব প্ৰস্তুতিয়ে। উল্লেখ যে ইতিমধ্যে সম্পন্ন হৈ যোৱা নামনি অসমৰ অডিচনত বিভিন্ন ঠাইৰ পৰা অভিনয় প্ৰতিভাৰ বিপুল সহাৰি লাভ কৰিছে প্ৰস্তুতিয়ে। হিৰামণি প্ৰডাকচন বেনাৰত নিৰ্মাণ হ'বলগীয়া ৰাজকুমাৰী ছবিখনৰ কাহিনী চিত্ৰ নাট্য সংলাপ অভিজিত ভট্টাচাৰ্যৰ আৰু প্ৰয়োজনা গুণজিৎ বৰ্মণৰ।এখন মনোৰঞ্জন ধৰ্মী পাৰিবাৰিক ছবি হিচাপে নিৰ্মাণ কৰিব লগীয়া বোলছবিখনৰ দৃশ্য গ্ৰহণ হ'ব অসম আৰু অৰুণাচলত।
লগতে পঢ়কঃআমেৰিকাত সাহিত্য চৰ্চাত এগৰাকী অসম কন্যাৰ
