যিকোনো মুহুৰ্তত বিপদ মাতিব পাৰে বুঢ়ীদিহিঙৰ মথাউৰিয়ে

ক্ৰমাৎ বাঢ়ি আহিছে বুঢ়ীদিহিং নদীৰ জলপৃষ্ঠ ৷ যাৰ ফলত এতিয়া ভয়-শংকাৰ মাজেৰে দিন অতিবাহিত কৰিছে খোৱাং আৰু নিতাইপুখুৰী সংযোগী ঐতিহাসিক বুঢ়ীদিহিং মথাউৰিৰ কাষৰীয়া অঞ্চলৰ ৰাইজে ৷ মথাউৰিটোৰ জৰাজীৰ্ণ ৰূপৰ বাবে এতিয়া ভয়ংকৰ বিপদৰ আশংকাত ভূগিছে অঞ্চলবাসী ৷

মৰাণ, 13 জুন : ডিব্ৰুগড় আৰু শিৱসাগৰ জিলাৰ সীমামুৰীয়া খোৱাং আৰু নিতাইপুখুৰী সংযোগী ঐতিহাসিক বুঢ়ীদিহিং মথাউৰিটো পুৰণি হৈ পৰাত শংকিত হৈ পৰিছে অঞ্চলটোৰ ৰাইজ ৷ ক্ৰমাৎ বাঢ়ি আহিছে বুঢ়ীদিহিং নদীৰ পানী ৷ যাৰ ফলত উক্ত পুৰণি বুঢ়ীদিহিং মথাউৰিটো বহু বছৰ ধৰি পুনঃনিৰ্মাণ নকৰাৰ ফলত দুৰ্বল হৈ পৰিছে ।

উল্লেখ্য যে, মথাউৰিৰ কাষৰ ৰাইজে বহু বছৰ পৰাই মথাউৰিটো পুনৰ নিৰ্মাণ কৰিবলৈ বিভাগীয় কৰ্তৃপক্ষক আহ্বান জনাই আহিছে যদিও আজিকোপতি ৰাইজৰ আহ্বানৰ প্ৰতি কৰ্তৃপক্ষই সঁহাৰি নজনোৱাৰ অভিযোগ উত্থাপন হৈছে ৷ ইতিমধ্যে প্ৰতি বছৰ বাৰিষাত ঠায়ে ঠায়ে মথাউৰিটোৰ কিছু কিছু অংশ খহি যোৱা পৰিলক্ষিত হৈছে ।

সম্প্ৰতি উক্ত খোৱাং-নিতাইপুখুৰী বুঢ়ীদিহিং মথাউৰিটো অতি শীঘ্ৰে পুনৰ নিৰ্মাণ তথা মেৰামতি কৰিবলৈ জলসম্পদ বিভাগৰ মন্ত্ৰীক দাবী জনাইছে খোৱাং আঞ্চলিক ছাত্ৰ সন্থাই ।

লগতে পঢ়ক: আৰক্ষীক প্ৰহাৰ কৰি ৰঙা ঘৰত সোমাল বিএচএফ জোৱান