মেচুকাত দুৰ্ঘটনাত পতিত হোৱা নাই অসমৰ বাহন, কুশলে আছে ডিব্ৰুগড়ৰ বনভোজ যাত্ৰী ডিব্ৰুগড়,২৩ ডিচেম্বৰ :এতিয়া বনভোজৰ বতৰ । পুৰণি বছৰটোক বিদায় দি নতুন বছৰক আদৰিবলৈ সকলো সাজু হোৱাৰ সমান্তৰালকৈ মনোমোহা পৰিৱেশত বনভোজ খোৱাত ব্যস্ত হৈছে বিভিন্নজন । ইয়াৰ মাজতে এক উৰা বাতৰিয়ে আলোড়নৰ সৃষ্টি কৰিছে ডিব্ৰুগড়ত । মানুহৰ মুখে মুখে ওলোৱা খবৰ অনুসৰি অৰুণাচলৰ মেচুকাত শুকুৰবাৰে নিশা দুৰ্ঘটনাত পতিত হৈছে বনভোজলৈ যোৱা দুখনকৈ বাহন ।
ডিব্ৰুগড়ৰ পৰা মেচুকাত বনভোজলৈ যোৱা সেই বাহন দুখনত আছিল প্ৰায় ১৩ জনীয়া এটা দল । কিন্তু বাহন দুখন দুৰ্ঘটনাত পতিত হোৱাৰ পাছত সেই লোকসকলৰ সৈতে যোগাযোগ বিচ্ছিন্ন হোৱাৰ খবৰ ওলাইছিল । এই খবৰ কেৱল সামাজিক মাধ্যমতে নহয় দুই এক সংবাদ মাধ্যমতো প্ৰকাশ পাইছিল । লগে লগে হাহাকাৰ পৰিৱেশৰ সৃষ্টি হয় । বনভোজলৈ যোৱা লোকসকলৰ পৰিয়ালৰ মাজতো হাহাকাৰ লাগিল ।
অৱশেষত শনিবাৰে পুৱাই আহিল এটা সন্তোষজনক খবৰ । অৰুণাচলৰ মেচুকাত কোনো ধৰণৰ সমস্যাৰ সন্মুখীন হোৱা নাই ডিব্রুগড়ৰ পৰা যোৱা বনভোজ যাত্ৰীৰ দলটো । কেৱল মোবাইল ফোনৰ নেটৱৰ্কৰ সমস্যাৰ বাবেহে পৰিয়ালৰ সৈতে তেওঁলোকে যোগাযোগ কৰিব পৰা নাছিল । পুৱাই পৰিয়ালৰ সৈতে বনভোজ যাত্ৰীৰ দলটোৰ সদস্যসকলে ফোনত কথা পাতিছে আৰু কোনো ধৰণৰ অসুবিধা হোৱা নাই বুলি জনাইছে ।
জানিব পৰা মতে বনভোজ যাত্ৰীৰ দলটোত আছে শিৱসাগৰ, যোৰহাট, ডিব্ৰুগড়ৰ প্ৰায় ১৩ জনকৈ লোক । তেওঁলোকে ডিব্রুগড়ৰ মেঘালী ট্ৰেভেলছ নামৰ প্ৰতিষ্ঠানটোৰ পৰা দুখন বাহন ভাড়াত লৈ মেচুকালৈ গৈছে । পৰিয়ালৰ সদস্যৰ পৰা জানিব পৰা মতে ২৫ ডিচেম্বৰৰ সন্ধিয়া দলটো ডিব্রুগড় আহি পাব । ইফালে দলটোৱে যি পৰিকল্পনাৰে মেচুকালৈ গৈছিল ঠিক তেনেদৰেই সময় পাৰ কৰিছে বুলিও জানিব পৰা গৈছে । উল্লেখ্য যে মেচুকাৰ নান্দনিক পৰিৱেশ উপভোগ কৰিবলৈ অসমৰ পৰা প্ৰতিবছৰে বহু লোকে ভ্ৰমণ কৰে । এইবাৰো বহু লোক মেচুকালৈ ভ্ৰমণ কৰিছে ।
লগতে পঢ়ক :আৰক্ষী চকীৰ চোতালত উদ্ধাৰ সদ্যোজাত শিশুৰ মৃতদেহ
